“Sabah”dan Avrokuboklarda tarixi göstərici - Heç bir komanda bunu etməmişdi

“Sabah” UEFA Çempionlar Liqasında tarixi göstəriciyə imza atıb.

Publika.az xəbər verir ki, bu barədə besoccer.com saytı məlumat yayıb.

Bakı təmsilçisi Liqa mərhələsinin 1-ci turunda “Old Trafford”da “Mançester Yunayted”ə qarşı meydana çıxardığı start heyəti ilə turnirin rekordunu müəyyənləşdirib.

“Sabah”ın ilk “11-liy”ində 11 fərqli milliyyətdən futbolçu yer alıb:

Stas Pokatilov (Qazaxıstan), Timoteuş Puxaç (Polşa), Rəhman Daşdəmirov (Azərbaycan), Eyden Makkarti (Cənubi Afrika Respublikası), Akim Zedadka (Əlcəzair), İvan Lepinitsa (Xorvatiya), Umarali Rahmonaliyev (Özbəkistan), Velko Simiç (Serbiya), Kahim Parris (Yamayka), Kristian Nvaçukvu (Nigeriya), Coy-Lens Mikkels (Ruanda).

Avropa Kuboku və Çempionlar Liqasının tarixində daha əvvəl heç bir komanda matça 11 fərqli milliyyətdən olan futbolçudan ibarət start heyəti ilə başlamayıb.

2006-cı ildə “Arsenal”ın “Hamburq”la görüşündə də eyni anda meydanda 11 fərqli milliyyətdən futbolçu olub. Lakin bu, əvəzetmədən sonra baş verib. “Sabah” isə buna start heyətində nail olan ilk klub kimi tarixə düşüb.

“Sabah”ın hazırkı heyətində ümumilikdə 16 fərqli milliyyətdən futbolçu var.

Qeyd edək ki, “Sabah”ın Çempionlar Liqasının əsas mərhələsində debüt etdiyi “Mançester Yunayted”lə görüş 0:4 hesabı ilə başa çatıb.