Mourinyodan Arda şərhi: "Meydana daxil olanda fərq yaratdı!"

“Real Madrid”in baş məşqçisi Joze Mourinyo La Liqanın 5-ci turunda şənbə günü “Rayo Valyekano” üzərində 4:1 hesablı qələbədən sonra müxtəlif mövzulara toxunub.

Publika.az xəbər verir ki, portuqaliyalı mütəxəssis matçdan sonrakı mətbuat konfransında Arda Gülərin, Yan Diomandenin və Viniçius Juniorun vəziyyəti barədə danışıb.

Mourinyo Arda Gülərin meydana daxil olduqdan sonra komandanın oyununa təsirini belə qiymətləndirib:

“Arda Gülər meydana çıxanda çox oynayır. Əminliklə deyə bilərəm ki, Diomande bu gün ilk 11-likdə başlamasaydı, ilk sual belə olardı: “Diomande niyə oynamır?”

Ehtiyat oyunçular skamyasında yalnız keyfiyyət görürsünüz. Dəyişikliklərdən oyundan-oyuna istifadə olunacaq. Ardanın komandanın çıxışına son dərəcə müsbət təsiri var. Meydana daxil olanda oyunun sabitliyində fərq yaratdı”.

Portuqaliyalı baş məşqçi Yan Diomandenin vəziyyətinə də münasibət bildirib:

“Bir futbolçunun vəziyyətinə görə təzyiq hiss etmək üçün artıq bir qədər yaşlıyam. Müxtəlif oyunçu siyahılarınız olur. Bəzən heç bir futbolçunun zədələnməməsi üçün dua etməli olursunuz, bəzən isə əlinizdə çoxlu seçim olur. O, tədricən inkişaf edəcək. Ən yüksək səviyyəyə çatmaq üçün çox vaxtı yoxdur və taktiki baxımdan öyrənməli olduğu çox şey var. Lakin heyranlıq doğuran potensiala sahibdir”.

Mourinyo sözlərinə belə davam edib:

“Diomande bizə fərdi mübarizələrdə, ötürmələrdə və zərbələrdə çoxlu seçimlər təqdim edir. O, həmçinin Vininin mövqeyində və sağ cinahda oynaya bilər. Arda da orada və ya Bellinqhemin mövqeyində çıxış edə bilər. Hazırda ona inkişafında kömək etmək istəyirəm”.

Mütəxəssis Viniçius Juniorun fiziki və psixoloji durumundan da danışıb: “Viniçius fiziki baxımdan əvvəlkindən daha yaxşı vəziyyətdədir. Lakin onun maksimal sürətinə çatmasına cəmi bir millimetr qalıb. Təkrar sürətlənmələri davam etdirmək qabiliyyəti möhtəşəmdir. Bu, onun tədricən mənimsədiyi bir prosesdir. O, mental baxımdan son dərəcə güclüdür və “Real Madrid”i hamıdan yaxşı tanıyır. Böyük məsuliyyətlə oynayır. Bu, həm “Real Madrid”, həm də Braziliya millisində çıxış etməyin məsuliyyətidir. O, sakit insandır. Qollar gələcək”.

Viniçiusun əvəzinə Mark Kukurellanı meydana buraxmasının səbəbinə də aydınlıq gətirən Mourinyo bildirib:

“Bu, sadə məsələdir. Mən qalib gəlmək və mümkün qədər çox qolla qalib gəlmək istəyirəm. Hesab 3:1 olanda, oyunun başa çatmasına beş dəqiqə qalmış və “Rayo”nun təhlükə yarada biləcək çox güclü cinah müdafiəçisi olduğu bir vaxtda hiss etdim ki, ən yaxşı seçim qapını bağlamaqdır. Məncə, həmin anda hücumlar qurmaq və qol vurmaq vaxtı başa çatmışdı. Daha sonra dördüncü qolu vurduq və bu, daha yaxşı oldu”.