Ronaldo qəzəblidir: Bu azarkeşlər ömürlük stadionlardan uzaqlaşdırılmalıdır

“Əl-Nəsr”in hücumçusu Kriştiano Ronaldo “Əl-Hilal”ın ulduzu və həmyerlisi Ruben Nevesə “Əl-Taavun” azarkeşlərinin təxribat xarakterli şüarlarından sonra dəstək verib.

Publika.az xəbər verir ki, matç zamanı Nevesin qəzəblənməsinə səbəb olan hadisə baş verib. “Əl-Taavun” azarkeşləri ötən il faciəli qəza nəticəsində həyatını itirən, keçmiş “Liverpul” futbolçusu, Nevesin həmyerlisi və dostu Dioqo Jotanın adını dəfələrlə şüar şəklində səsləndiriblər. Bu, görüş zamanı “Əl-Hilal” futbolçusunu təxribata çəkmək cəhdi kimi qiymətləndirilib.

Hadisəni əks etdirən video sosial şəbəkələrdə yayılıb. Ronaldo rəsmi “Instagram” hesabında həmin videoya şərh yazaraq azarkeşlərin davranışını sərt şəkildə tənqid edib.

“Liqanın hərəkətə keçməsi və azarkeşlərin bu cür davranışlarını cəzalandırması lazımdır. Bunun artıq futbolla heç bir əlaqəsi yoxdur və mütləq sərhəd qoyulmalıdır. Çünki belə davranan insanların bir daha stadionlara buraxılmaması lazımdır”, deyə Ronaldo bildirib.

Qeyd edək ki, matç başa çatdıqdan sonra Neves jurnalistlərin qarşısından keçib. Ondan hadisə ilə bağlı şərh verməsi istənilsə də, futbolçu bu barədə ətraflı danışmaqdan imtina edib. Bununla belə, “Al-Taavun” azarkeşlərinin davranışını açıq şəkildə tənqid edən qısa fikir səsləndirib.

Neves deyib: “Ümid edirəm ki, “Əl-Taavun” azarkeşləri namaz qılmağa getmirlər”.

Futbolçunun bu sözlərlə tribunadakı davranışın insani dəyərlərə və səmavi dinlərin prinsiplərinə zidd olduğuna işarə etdiyi bildirilir.