Rəhbərlik dəyişdi, qızıl qiymətləri "partladı"

Qızılın unsiyası 2758 dollara qalxaraq 2024-cü ilin noyabrın 1-dən bəri ən yüksək səviyyəyə çatıb.

Publika.az xəbər verir ki, qızıl qiymətləri 11 həftənin ən yüksək səviyyəsinə yüksəlib.

Qiymətli metallar üzrə analitik Adam Harris deyib ki, bu artımın qızıl üçün uzunmüddətli perspektivdə nə demək olduğunu söyləmək çətindir:

“Trampın ABŞ-ın əsas ticarət tərəfdaşlarına qarşı siyasətini nə vaxt həyata keçirmək istəməsi ilə bağlı hələ də qeyri-müəyyənlik var. Bu da öz növbəsində dollarda qeyri-müəyyənliyə səbəb olur. Bütün bu amillər qızıl qiymətində yüksəliş tonunu hərəkətə gətirən əsas qısamüddətli katalizatordur.

Tramp Avropa İttifaqını tariflərlə vuracağına söz verib və onun administrasiyasının fevralın 1-dən etibarən Çindən idxal olunan mallara 10 faizlik gömrük rüsumunun tətbiqini müzakirə etdiyini bildirib. Lakin Trampın inflyasiyaya səbəb olduğu siyasəti FED-i faiz dərəcələrini daha uzun müddət daha yüksək saxlamağa vadar edərsə, qızılın inflyasiya hedcinqi kimi cəlbediciliyi azala bilər. Gələn həftə FED-in bir gözü Tramp administrasiyasının siyasətində, digər gözü isə faiz dərəcələrini artıran istiqraz bazarında olacaq”.

Aysel Şahmar