Məşhur tarzən: “Yaratdığın başlanğıclar üçün səni daim yüksəklərdə anacağıq”

Azərbaycan professional musiqi sənətinin banisi dahi bəstəkar Üzeyir Hacıbəylinin (1885-1948) dünyaya gəldiyi 18 sentyabr tarixi ölkəmizdə ənənəvi olaraq Milli Musiqi Günü (Üzeyir Musiqi Günü) kimi təntənə ilə qeyd edilir.

Publika.az xəbər verir ki, bütün musiqiçiləri bu gün münasibətilə təbrik edən tanınmış tarzən Arslan Növrəsli musiqiyə gəlişini yada salıb.

“Bu gözəl payız havası məni çox-çox keçmişlərə apardı, 1987-ci ildə, düz 33 il bundan əvvəl, dərin musiqi dəryasına qovuşduğum günə. Balaca uşaq bir əlində tarı güclə tutaraq digər əli ilə atasına bərk-bərk sarılıb musiqi dünyasına ilk addımlarını atanda bilmirdi ki, həyatının neçə onilliyini Azərbaycan mədəniyyətinə həsr edəcək. Həm də bir göz qırpımında haqladığı 40 yaş ərəfəsində Üzeyir Hacıbəyli dühasını dərk edən bütün musiqisevərləri təbrik edəcək.

Sənə minnətdarıq, ey dahi insan! Musiqimizi layiqincə təbliğ etməyə yaratdığın şərait və başlanğıclar üçün səni daim yüksəklərdə anacağıq. 135-ci doğum günün mübarək!”, - tarzən qeyd edib.