Sərxan Sərxan danışdı: “Sensasiya yaratmağa çalışıb”

Elə jurnalistlər var ki, 1 dəqiqəlik məşhurluq üçün sensasiya yaradırlar. Bəzən müsahibənin kontekstindən kənara çıxırlar. Bunu bilərəkdən və məqsədli şəkildə etdiklərini düşünmürəm... Bu yaxınlarda incəsənət və estrada musiqisi barəsində geniş müsahibə vermişdim, hansısa sözə interpritasiya edərək başlıq çıxarıb internetdə paylaşıblar.

Publika.az xəbər verir ki, bu sözləri Xalq artisti Sərxan Sərxan videomüraciətində deyib. O, sonuncu müsahibəsində rayonluların teatr, konsert anlayışının olmaması barədə yayılan xəbərlərə aydınlıq gətirib. Sosial şəbəkələrdə kəskin tənqidə məruz qalan müğənni anlaşılmazlıq olduğunu və hadisələrin bu cür vəziyyət almasına üzüldüyünü bildirib:

“Düz etmirlər, cəmiyyətdə fikir ayrılığı yaradırlar. Gənc jurnalistlərə həmişə yardım etməyə çalışmışam. Amma belə alçaq yolla məşhurluq qazanmaq olmaz. Məndən müsahibə alan jurnalistin belə bir məqsədinin olduğunu düşünmürəm. O, ürəklə işini görürdü. Mən hətta yazını oxumuşdum. Görünür, yazıda müxtəlif mövzular olsa da, daha yüksək səlahiyyətləri olan şəxs həmin ifadəni önə çıxararaq sensasiya yaratmağa çalışıb.

İstəyirəm, onlar bundan arınsınlar. Bu, bizi birləşdirmir, tam əksi, parçalayır. Diqqətli olun. Hər bir halda mən sizin hamınızı, bütün Azərbaycan xalqını sevirəm. Yazıda qeyd ediblər ki, rayonluları sevmir, dərinə getsək, biz elə hamımız rayonluyuq. Heç vaxt bunu ayırmamışam. Sizin üçün darıxıram. Uçuşlar mümkün olduğu halda Moskvadan qayıdacağam”.

Məlumat üçün bildirək ki, Sərxan Sərxanın “Rayonlu nə bilir konsert nədir, teatr nədir?” başlığı altında yayılan müsahibəsi səs-küy doğurmuşdu.