Xalq artisti rəssam qızı ilə Cıdır düzündə - FOTO

Xalq artisti Mələkxanım Əyyubova rəssam qızı Nəzrin Nəcəfova ilə birlikdə sənədli filmin çəkilişləri üçün Şuşaya yollanıb.

Publika.az xəbər verir ki, bu barədə instaqramda məlumat verən xanəndə həm də Cıdır düzündən fotolar paylaşıb. Xalq artisti qeyd edib ki, lentə alınan ekran işi yaradıcılıq yolunu əhatə edir.

"1992-ci ilin yanvarında Şuşada konsert proqramı ilə çıxış elədim. Və heç zaman düşünməzdim ki, mən bu konsertdən sonra Şuşaya 30 il həsrət qalacağam. Yuxuma belə gəlməzdi ki, 30 il sonra haqqimda film çəkiləcək və onun ilk görüntüləri Şuşadan başlayacaq. Şükür bu günümüzə. Allah şəhidlərimizə rəhmət eləsin. Ruhları şad olsun".

M.Əyyubova ilə birlikdə Şuşaya rəssam və bloger qızı Nəzrin Nəcəfova da yollanıb. O, paylaşımında "Uşaqlığımdan bəri hər zaman Şuşanın gözəlliyini, mədəniyyətini, havasını, əzəmətini eşitmişəm. Lakin nə vaxtsa buraya gəlib, bu torpaqları görəcəyimə, havasını udacağıma inana bilməzdim. Çox şükür bu günümüzə. Allah bütün şəhidlərimizə rəhmət etsin. Biz onların sayəsində bu gün buradayıq. Ruhları daim şad olsun" - qeyd edib.