Yadplanetlilər Yerdə bunlarla qidalana bilərlər - Yeni iddia

Yadplanetlilərin Yer kürəsində qidalana biləcəyi ehtimal edilən vasitələr barədə yeni iddialar oralığa atılıb.

Publika.az xəbər verir ki, bu barədə Valensiya Universitetinin professoru, dietoloq Xose Migel Soriano del Kastilyo "The Conversation" nəşrindəki məqaləsində məlumat yayıb.

Alim xəbərdarlıq edir ki, planetimiz yerdənkənar həyat nümayəndələri üçün "təhlükəli ziyafət" məkanına çevrilə bilər.

Mütəxəssisin fikrincə, yadplanetlilərin təməl biologiyası insanlarla oxşar olsa belə, insanlar üçün təhlükəsiz sayılan qidaların onların həzm sistemi ilə uyğun gələcəyinə heç bir zəmanət yoxdur. Onun sözlərinə görə, yerdənkənar sivilizasiya nümayəndələri çox güman ki, bizim üçün ənənəvi olan qidalardan daha çox, Yer üzündə tapacaqları "xam maddələrə" üstünlük verəcəklər.

Kastilyo izah edib ki, onlar öz həyat fəaliyyətlərini su, azot, fosfor, dəmir, duzlar, lipidlər, mikrob biokütləsi və ya sadə üzvi molekullar hesabına qoruya bilərdilər. Eyni zamanda, Hollivudun "Yadplanetli" filmindəki personajın yediyi konfetlər qida kimi çox ehtimal ki, onlara yaramayacaq.

Bununla yanaşı, ekspert xəbərdarlıq edib ki, Yerin ətraf mühiti yadplanetlilər üçün potensial toksin, patogen və allergen ola biləcək maddələrlə də zəngindir. Bundan əlavə, zülal və ya şəkər kimi bəzi birləşmələr qida kimi onlar üçün tamamilə yararsız ola bilər.

Kastilyo iddia edir ki, gələcəkdə bəşəriyyət yerdənkənar sivilizasiya ilə təmasa keçərsə, yadplanetlilərin qidalanması üzrə xüsusi mütəxəssislərin hazırlanmasına ehtiyac yaranacaq. Bu, kosmosun digər yerlərindən gələn varlıqlar üçün hansı enerjinin və hansı miqdarda tələb olunduğunu müəyyən etməyə imkan verəcək. Professorun sözlərinə görə, həmçinin bu cür orqanizmlərdə resursların ötürülməsinin necə baş verdiyini öyrənmək lazım gələcək. (Oxu.az)