Dünyanın ən qədim gəmi qəzası Türkiyə sahillərində olub - Yeri tapıldı

Arxeoloqlar Türkiyə sahillərində eramızdan əvvəl 2700-2400-cü illərdə qəzaya uğradığı güman edilən gəmi aşkar ediblər.

Publika.az xəbər verir ki, bu barədə "The Conversation" qəzeti məlumat yayıb.

Əgər tarix təsdiqlənərsə, təxminən 4500 illik tapıntı dünyanın ən qədim gəmi qəzası olacaq.

Gəmi qəzası 2024-cü ildə Antalya şəhərinin qərbindəki Kekova sahillərində dayaz sularda aşkar edilib. Tədqiqatçılar tapıntının təxmini yaşını keramika qablar da daxil olmaqla, yükünə əsasən müəyyən ediblər.

Gəminin gövdəsi uzun müddət sualtı mühitdə qaldığı üçün dağılıb.

Dəqiq tarixləndirmə hələ də öyrənilir. Əvvəllər ən qədim gəmi qəzası Yunanıstanın Dokos adası yaxınlığında təxminən 4200 il əvvələ aid edilirdi.

Bu kəşf eramızdan əvvəl üçüncü minillikdə Şərqi Aralıq dənizindəki ticarət əlaqələrinə işıq sala bilər. Bu dövrdə Misir Livanın Byblos limanı vasitəsilə sidr, metallar, yağlar, qatranlar və gümüş də daxil olmaqla vacib mallar alırdı. Tədqiqatlar göstərir ki, eramızdan əvvəl 2600-cü illərdə Misirə, xüsusən də müasir Afina yaxınlığındakı Laurium mədənlərindən gümüş idxal olunurdu.

Tədqiqatçıların fikrincə, Kekova yaxınlığındakı gəmi Aralıq dənizinin müxtəlif bölgələrini birləşdirən geniş dəniz ticarət şəbəkəsinin bir hissəsi ola bilərdi.

Gəmi, ehtimal ki, cənub sahili boyunca üzürmüş və fırtına zamanı adalar arasına sığınıb, lakin qayaların üzərində qəzaya uğrayıb.

Arxeoloqlar hələlik yükün tarixini və mənşəyini təsdiqləməyiblər. Lakin tapıntı artıq Aralıq dənizində erkən dəniz ticarətinə dair mühüm dəlillər təqdim edə bilər.

Müəllif: Tural