Rusiya sovet dövründən qalma 20 min bomba sığınacağını bərpa edir: Nəyə hazırlıq görülür?

Rusiya Fövqəladə Hallar Nazirliyi hazırda ölkənin 82 bölgəsində 20 mindən çox bomba sığınacağını bərpa edir.

Publika.az xəbər verir ki, bu barədə nazirliyin rəhbəri Aleksandr Kurenkov nazirliyin yekun kollegiyasının genişləndirilmiş iclasında bildirib. Onun sözlərinə görə, 45 bölgədə xəbərdarlıq sisteminin hazırlıq planları təsdiqlənib. Sığınacaqların və təxliyə məntəqələrinin ünvanları Dövlət Xidməti portalında yerləşdirilib.

Rusiya hakimiyyəti Sovet dövründən qalma sığınacaqların genişmiqyaslı yenidən qurulmasına və modernləşdirilməsinə yalnız 2025-ci ilin may ayının sonlarında başlayıb. Fövqəladə Hallar Nazirliyinin məlumatına görə, bu işlər təxminən 155 milyard rubl tələb edəcək.

Fövqəladə Hallar Nazirliyinin 2022-ci il məlumatlarına görə, ölkə üzrə bomba sığınacaqların təxminən 67%-i istifadəyə tamamilə yararsız hesab olunur. Yalnız 16%-i atəş və ya nüvə təhlükəsi halında vətəndaşları effektiv şəkildə qoruya bilir, digər 17%-i isə qismən istifadəyə hazırdır.

İstifadəyə yararsız və qismən istifadəyə yararlı sığınacaqların yoxlanılması zamanı konstruksiya zədələnməsi, çürümüş elementlər, kif və pas, sınmış qapı və pəncərələr qeydə alınıb. Su, kanalizasiya və elektrik enerjisi çox vaxt mövcud olmayıb və girişlər torpaq, zibil və ya digər əşyalarla bağlanıb.

Tural