Türk diplomat Rusiyadan Azərbaycanla bağlı mesaj verdi

Azərbaycan xalqı 34 il əvvəl çox böyük faciə ilə üzləşib.

Publika.az xəbər verir ki, bu sözləri Türkiyənin Moskvadakı səfiri Tanju Bilgiç Xocalı soyqırımının 34-cü ildönümü ilə bağlı Azərbaycanın Rusiyadakı səfirliyində keçirilmiş anım tədbiri çərçivəsində jurnalistlərə müsahibəsində deyib.

Səfir xatırladıb ki, Xocalı faciəsi zamanı 613 nəfər həyatını itirib, minlərlə insan yaralanıb: “Hələ də taleyi naməlum olan çoxlu sayda itkin insan var. Biz bu qətliamı o zaman da qınamışıq və bu gün də qınayırıq”, – deyə o vurğulayıb.

Tanju Bilgiç qeyd edib ki, Türkiyə ilə Azərbaycan arasında münasibətlər yüksək səviyyədədir: “Biz bir millət, iki dövlətik və hər zaman Can Azərbaycanın yanındayıq. Bundan əvvəl olduğu kimi, bundan sonra da Azərbaycan haradadırsa, biz də onun yanında olmağa davam edəcəyik”.

Səfir, həmçinin bildirib ki, bu gün Azərbaycan səfirliyində çox əhəmiyyətli bir tədbir təşkil olunub: “Biz yalnız itirdiyimiz insanları yad etmədik, eyni zamanda həmin bölgədə hazırda aparılan işlərlə də yaxından tanış olmaq imkanı əldə etdik. Fürsətdən istifadə edərək, həyata keçirilən işlərə görə Azərbaycan dövlətinə və səfirliyə təşəkkürümü bildirirəm”, - deyə Tanju Bilgiç vurğulayıb.