Deputat təhdid olundu: "Dedi polisəm, biri isə silahını arxasında gizlədərək..."

Ukraynada deputatı məcburi müharibəyə aparmaq istəyiblər.

Publika.az xəbər verir ki, Ali Radada hakim "Xalqın xidmətçisi" partiyasını təmsil edən Roman Kaptelov Teleqram kanalında diqqət çəkən paylaşım edib. Deputat maskalı şəxslərin onu Dnepr şəhərində təhdid altında səfərbər etməyə çalışdıqlarını yazıb.

Parlamentarinin sözlərinə görə, onu axşam saatlarında Yavornitski prospektində saxlayıblar. Əvvəlcə deputatın yanında avtobus dayanıb və oradan maskalı şəxslər düşüblər.

"Onlara polis çağırmağı da təklif edəndə bu şəxslərdən biri özünü polis əməkdaşı kimi təqdim etdi. Digər maskalı şəxslər isə özlərini təqdim etmədilər. Heç bir sənəd də təqdim etmədilər", - Kaptelov yazıb.

Siyasətçi iddia edib ki, həmin insanları səfərbər edən qupda olanlardan biri əlini arxasında gizlədirmiş və onun əlində tapança olub. O, deputatı ehtiyac yaranacağı təqdirdə silahdan istifadə edəcəyi, eləcə də fiziki zorakılıqla hədələyib.

Kaptelov həmçinin qeyd edib ki, Ukraynada bu cür hadisələr hər gün baş verir. Buna görə də, parlamentari ölkə hakimiyyətini mövcud vəziyyəti dərhal həll etməyə çağırıb.

"Artıq dözmək olmur. Hər gün eyni şey baş verir: qara maskada, sənədsiz və özlərini təqdim etməyən, silahlı olan bu adamlar vətəndaşları qorxudur və alçaldırlar", - deyə deputat əlavə edib.

Tural