Ukraynaya son ultimatum: Rusiya danışıqlardan çıxır

Rusiya liderləri Kiyev ərazi güzəştlərinə dərhal razılaşmasa, ABŞ-ın vasitəçiliyi ilə aparılan sülh danışıqlarına tamamilə son qoymağı düşünürlər.

Publika.az xəbər verir ki, bu barədə “Bloomberg” məlumat yayıb.

Qapalı qapılar arxasında keçirilən məsləhətləşmələrlə tanış olan mənbələrə görə, Moskva hesab edir ki, Ukraynanın şərqdəki mövqelərindən imtina etmək istəyi olmadan dialoqu davam etdirməyin mənası yoxdur.

Kremlə yaxın iki mənbə bildirib ki, "Gələn həftə keçiriləcək danışıqlar mərhələsi tərəflərin müharibəyə son qoymaq üçün şərtlər barədə razılığa gəlib-gəlməyəcəyini müəyyən etməkdə həlledici olacaq". Nəşrin məlumatına görə, əgər Volodimir Zelenski bu əsas tələbi yerinə yetirməkdən imtina edərsə, Rusiya nümayəndə heyəti prosesdən çıxacaq.

Sərt mövqelərinə baxmayaraq, tərəflər artıq mümkün gərginliyin azaldılması üçün zəmin yaradıblar. Agentliyin mənbələrindən biri izah edib ki, "Ukrayna qoşunlarını Donetsk vilayətinin şərq hissəsindən çıxarmağa razı olarsa, Rusiya sülh müqaviləsi haqqında memorandum layihəsini imzalamağa hazırdır". Bu ssenariyə görə, sənəd imzalandıqdan sonra Vladimir Putin, Donald Tramp və Volodimir Zelenski arasında yekun razılaşmaları təsdiqləmək və qüvvələrin qarşılıqlı çıxarılması mexanizmini işə salmaq üçün təcili görüş keçirilə bilər.

Nəşrin qeyd etdiyi kimi, Moskva müəyyən güzəştlərə getməyə hazır olduğunu, o cümlədən Vaşinqtonun himayəsi altında atəşkəs monitorinqinə icazə verməyə hazır olduğunu bildirib. Lakin Kreml Ukrayna ərazisində hər hansı xarici qüvvələrin mövcudluğunu qəti şəkildə rədd edir.

Tural