Azərbaycan Avropanın enerji təhlükəsizliyində xüsusi əhəmiyyətə malikdir - ŞƏRH

Dünya İqtisadi Forumu beynəlxalq iqtisadiyyatda ötən il ərzində baş verən hadisələr üzrə müəyyən təhlillərin aparılması və növbəti illər ərzində gözlənilən məsələlərlə bağlı diskussiyaların, panellər və çoxtərəfli görüşlərin təşviq olunduğu bir platformadır.

Bu fikirləri Publika.az-a açıqlamasında iqtisadçı Elman Sadıqov səsləndirib.

İqtisadçı vurğulayıb ki, Azərbaycan Avropanın enerji təhlükəsizliyi üçün əhəmiyyəti olan ölkələr siyahısındadır: “Forumda önəmli məsələlərdən olan qlobal iqtisadiyyatdakı mövcud çağırışlar müzakirə olunur. Dünya Bankı və Beynəlxalq Valyuta Fondu tərəfindən müxtəlif ölkələrə tövsiyələr verilir. BVF-nin bu yaxınlarda verdiyi açıqlamaya görə, qlobal iqtisadiyyat ciddi problemlərlə üzləşə bilər. ABŞ, Yaponiya kimi ölkələr doymuş iqtisadiyyata malikdir. Bu fonda da inkişaf etməkdə olan, xüsusilə orta gəlirli ölkələrə daha çox diqqət ayrılır. Çünki onlara həm investisiya nöqteyi-nəzərdən, həm də iqtisadiyyatlarının durğunluqdan çıxması üçün potensial kimi baxılır. Həmin ölkələrdən biri də Azərbaycandır. Ölkəmiz Avropanın enerji təhlükəsizliyi baxımından xüsusi əhəmiyyətə malikdir. Azərbaycan qeyri-neft sektorunda artım potensialı olan ölkədir, bu isə iqtisadiyyatın böyüməsinə rəvac verir. Bu mənada tədbirdə diqqət mərkəzində ola biləcək ölkələrdən biridir”.

E.Sadıqov qeyd edib ki, Prezident İlham Əliyevin Forum çərçivəsində keçirdiyi ikitərəfli görüşlər ölkəyə investisiya cəlbinin artmasına təsir göstərə bilər: “Bu baxımdan ölkə başçısının “VTB Bank”ın prezidenti Andrey Kostinlə görüşü xüsusilə əhəmiyyətlidir. Prezident bankın Azərbaycan iqtisadiyyatının real sektoruna kredit qoyuluşunun artırılmasını təklif etdi. Bir sözlə, Davos İqtisadi Forumu bütün ölkələr üçün xüsusi əhəmiyyəti olan tədbirə çevrilib”.

Tağı Həsənov