Ermənistana son şans verdiyini söyləməklə... - Deputat

“Təmas xətti” və “status-kvo” Minsk Qrupunun işlətdiyi terminlərdir. Onların yoxluğunu vurğulamaqla İlham Əliyev Minsk Qrupuna “bundan sonra şərtləri biz verəcəyik”, ya da “danışıqlar olarsa, bizim şərtlərlə aparılmalıdır”, “şərtlərimiz qəbul olunmasa, ordumuz hücumları davam etdirəcək” demək istəyib.

Publika.az xəbər verir ki, bu sözləri millət vəkili Erkin Qədirli qeyd edib. O bildirib ki, bu şərtləri ölkə başçısı Cəbrayılın qaytarılmasıyla bağlı xalqa müraciətində açıqlayıb:

““Ermənistan üçün son şans” sözlərinin gerçək ünvanı Avropa Şurasıdır. Oktyabrın 12-də AŞPA-nın Daimi Komitəsinin iclasında Ermənistanla Azərbaycan arasında döyüşlərin bölgə üçün yarada biləcəyi təhlükələr müzakirə olunacaq. Ermənistana son şans verdiyini söyləməklə İlham Əliyev sonrakı gedişata görə bütün məsuliyyəti Nikol Paşinyanın üstünə atmış oldu”.

Erkin Qədirlinin sözlərinə görə, uzunmüddətli atəşkəsin baş tutacağı mümkün görünmür:

“Onu mümkünsüz edən sistem amilləri var. Şəraitin kəskin dəyişməsi Bişkek Anlaşmasıyla müqayisəni yersiz edir. Ordumuz həm şimal, həm də cənubdan keçmiş Dağlıq Qarabağ Muxtar Vilayətinin ərazisinə girib. Şəraitin belə kəskin dəyişməsi istənilən atəşkəsin ömrünü qısa edəcək. Ermənilər bizi keçmiş DQMV-nin ərazisindən çıxarmağa, ordumuz isə onun içinə doğru, daha dərinə getməyə çalışacaq”.