Onların qarayaxma kampaniyası nəticəsiz qalacaq - Deputat

“Azərbaycanın üzərinə hücum çəkən, qarayaxma kampaniyası aparan Almaniyanın Bakıdakı səfirliyi işğaldan azad olunmuş ərazilərə səfər etməkdən imtina edərək Parislə həmrəy olduqlarını göstərdi”.

Bunu Publika.az-a açıqlamasında millət vəkili Rasim Musabəyov deyib. Millət vəkili Almaniyada son günlər Azərbaycana qarşı başlayan qarayaxma kampaniyasının əsassız olduğunu söyləyib:

“Güman edirəm ki, baş verənlərə görə təlaşlanmaq lazım deyil. Çünki Azərbaycan Ermənistandan fərqli olaraq Qərbin maliyyə dəstəyindən, nağd vəsaitlərindən asılı ölkə deyil. Bizim neftimiz var və öz neftimizi onun pulunu ödəmək istəyən hər kəsə satırıq. Yəni bizi heç nə ilə təhdid edə bilməzlər. Neftimizi ödəmək istəyən hər kəsə satırıq”.

R.Musabəyov qeyd edib ki, Fransa, Almaniya və Benilüks ölkələrindən Azərbaycana gətirilən sənaye avadanlıqlarının yerini dolduracaq alternativlər var: “Almaniyanın yerini İtaliya, Yaponiya, Cənubi Koreya, Sinqapur və Çin doldura bilər. Bu ölkələr bütün təminatımızı qarşılamaq gücündədir. Fikrimcə, Almaniya və Benilüks ölkələri Azərbaycanı bu yolla “sancmaq” siyasətlərinin nəticəsiz olduğunu anlayacaq”.

Tural Turan