Azərbaycan NATO ilə əməkdaşlığı davam etdirəcək - Deputat

4 may 1994-cü il tarixində Azərbaycan Respublikası NATO-nun “Sülh Naminə Tərəfdaşlıq” Proqramına qoşuldu. Ötən 27 il ərzində Azərbaycanın NATO ilə əməkdaşlığı mütərəqqi yol keçdi.

ABŞ Dövlət katibi bu yaxınlarda Prezident İlham Əliyevlə telefon söhbətində Azərbaycanın Əfqanıstanda sülhməramlı missiyada iştirakını yüksək qiymətləndirdi.

Ekspertlər də hesab edir ki, Azərbaycan NATO standartları səviyyəsində müasir və güclü orduya malikdir.

Azərbaycan Ordusu regionda sabitlik və sülhün möhkəmlənməsinə xidmət edir. Bütün bunlar Azərbaycan-NATO münasibətlərinə nə kimi töhfələr verə bilər?

Milli Məclisin deputatı, Azərbaycan Demokratik İslahatlar Partiyasının (ADİP) sədri Asim Mollazadə Publika.az-a açıqlamasında söyləyib ki, Azərbaycan hər zaman NATO ilə tərəfdaşlıq münasibətlərində olub:

“NATO-nun proqramlarında sərbəst şəkildə iştirak edib. Bu gün Azərbaycan NATO-nun Əfqanıstandakı sülhməramlı kontingentinin tərkibindədir. Daha doğrusu, burada Türkiyə sülhməramlılarının tərkibində sülhməramlı əməliyyatlarda fəaliyyət göstərir. Bununla yanaşı, Azərbaycan NATO-ya və Amerika Birləşmiş Ştatlarının Əfqanıstandakı silahlı qüvvələrinə çox böyük logistik dəstək verir. Eyni zamanda, Azərbaycan NATO-nun üzvü olmaq istəmir. Ölkəmiz öz Silahlı Qüvvələrini bu təşkilatın müasir təcrübəsinə uyğun inkişaf etdirir”.

ADİP sədrinin fikrincə, bununla bağlı bizə ən böyük dəstəyi NATO-da həcminə görə ikinci ən böyük Silahlı Qüvvələrə sahib qardaş Türkiyə verir:

“Hər iki ölkə təlimlərdə birgə iştirak edir. NATO-nun ən yüksək səviyyəli sistemləri Azərbaycan Silahlı Qüvvələrinə gətirilib. 44 günlük Vətən müharibəsindəki qələbəmizdə də bu amilin çox müsbət rolu olub. Mən əminəm ki, Azərbaycan NATO ilə əməkdaşlığını davam etdirəcək. Bununla yanaşı, xatırlatmaq istəyirəm ki, Azərbaycan Qoşulmama Hərəkatının üzvüdür. Heç bir hərbi bloka üzv deyil. Qoşulmama Hərəkatına sədrliyi həyata keçirən bir ölkə kimi bizim əsas istəyimiz əməkdaşlıq, tərəfdaşlıq və stabillikdir”.

Tural Turan