Onların Nüvədiyə qayıtmaq hüququ var - Qabil Hüseynli

Nüvədi sakinlərinin öz torpaqlarına qayıtmaq hüquqları var. Avropa İnsan Hüquqları Konvensiyasında bu məsələlər öz əksini tapıb. Bu məsələlərdən biri də insanların güclə deportasiya edildiyi yerlərə qayıtmasıdır.

Bu sözləri Publika.az-a açıqlamasında politoloq Qabil Hüseynli deyib.

Politoloq bildirib ki, Nüvədi sakinlərinə qarşı ağır mübarizə formaları tətbiq edilib: “Nüvədi vətəndaşları uzun müddət öz kəndlərini tərk etmədi. Onlara qarşı ağır mübarizə formaları tətbiq edildi. Suları kəsildi, kəndə ərzaq göndərilməsinin qarşısı alındı. Ermənilər bütün istibdad metodlarından istifadə etdilər ki, həmin adamları məcburiyyət qarşısında qoyub ərazidən çıxarsınlar. Nüvədi camaatı 2 il mübarizə apardı. Sonradan rus əsgərlərinin köməyi ilə onlar deportasiya edildi. Evləri qiymətləndirilmədən, qiymətləndirildikdən sonra kompensasiya haqları ödənilmədən onları həmin ərazidən çıxardılar. İndi isə doğulduqları ərazilərə qayıtmaq istəyirlər. Bu, onların Avropa İnsan Hüquqlarının fundamental prinsiplərinə söykənən haqlarıdır. İnanıram ki, Avropa İnsan Hüquqları Məhkəməsi bu məsələni həll edəcək”.

Rahib Ələsgərli