Bu, ölkəyə investisiya axınını gücləndirəcək - Şərh

Azad iqtisadi zonanı yaratmaq üçün müəyyən potensial olmalıdır. Bu layihəni həyata keçirən ölkə investisiya axınını gücləndirməlidir. Azərbaycan tək Ələtdə deyil, digər regionlarda da bu cür azad iqtisadi zonalar yarada bilər.

Bunu Publika.az-a açıqlamasında iqtisad elmləri doktoru, professor Əli Əlirzayev deyib.

Professor qeyd edib ki, azad iqtisadi zonaların yaradılması Azərbaycan iqtisadiyyatının mühüm istiqamətlərindən biridir: “Bu cür layihələrin Azərbaycan üçün xeyri ondan ibarətdir ki, investisiya axını təmin olunacaq. Azad iqtisadi zonada əsas şərtlərdən biri də vergi amilini tənzimləməkdir. Yəni müəyyən mənada vergilərin ləğv olunması deməkdir. Burada əsas məqsədlərdən biri də keyfiyyətli məhsul istehsal edib dünya bazarına ixrac etməkdir. Ölkəmiz üçün bu cür layihələrin həyata keçirilməsinin böyük əhəmiyyəti var”.

Ə.Əlirzayev vurğulayıb ki, Azərbaycan həm neft sektorunda, həm də qeyri-neft sektorunda uğurlu layihələr həyata keçirir: “Ölkəmizin əsas məqsədlərindən biri qeyri-neft sektorunu inkişaf etdirməkdir. Möhtərəm Prezidentimiz də çıxışında qeyd etdi ki, ümumi daxili məhsulda neft sektorunun payının az olmasına baxmayaraq, iqtisadiyyat potensialında çoxdur. Biz iqtisadiyyatımızı inkişaf etdirməliyik. Bunu da yalnız neft sektoru ilə deyil, qeyri-neft sektoru ilə də həyata keçirməliyik. Biz digər sahələrə önəm verdikcə iqtisadiyyatımız da inkişaf edəcək. Həm daxili tələbatımızı ödəmək, həm də xarici bazarlara məhsullarımızı ixrac etmək bizim üçün əhəmiyyət kəsb edir”.

Rahib Ələsgərli