Bu təşəbbüsün ölkəmizin adı ilə bağlı olması qürurvericidir - Deputat

“Bu gün dünyada COVID-19-a qarşı peyvəndləmə sahəsində çox ciddi ədalətsiz bölgü mövcuddur. Qitələr arasında ən aşağı peyvəndləmə Afrikadadır. Afrika ölkələrinin əksəriyyəti maliyyə imkanlarının olmaması səbəbindən peyvənd əldə edə bilməyib”.

Publika.az xəbər verir ki, bu sözləri millət vəkili Nurlan Həsənov deyib. O bildirib ki, varlı və kasıb ölkələr arasında peyvəndlərə çıxışla bağlı getdikcə dərinləşən qeyri-bərabərliyə qarşı Qoşulmama Hərəkatının sədri kimi Azərbaycan Prezidenti davamlı olaraq təklif və təşəbbüslərlə çıxış edib:

“Dünən BMT Baş Assambleyasının 76-cı sessiyası çərçivəsində Qoşulmama Hərəkatının sədri qismində Azərbaycan Respublikası Prezidentinin təşəbbüsü ilə Qoşulmama Hərəkatı üzvləri adından irəli sürülmüş “COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi” adlı qətnamə BMT üzv dövlətləri tərəfindən qəbul edilib. Qətnamə dekabr ayında bu dəfə artıq BMT Baş Assambleyasının plenar sessiyasında qəbul olunacaq. Bu qətnamə dünyada peyvəndləmənin daha ədalətli aparılmasının təmin edilməsi istiqamətində effektiv addımlar atılacağına ümidlər yaradır. Bu təşəbbüsün ölkəmizin adı ilə bağlı olması qürurvericidir”.