Qalib ölkənin jurnalisti də qalib kimi davranmalıdır

Müasir dövrdə mətbuatdan gözləntilər klassik mənada baxışlardan xeyli fərqlənir. Artıq informasiya anlayışı mətbuatın digər hədəflərini kölgədə qoyub. Xüsusən sürətli informasiya və çevik reaksiyalar, üstəlik ən müasir texnoloji vasitələrin imkanlarının tətbiqi şəraitində, güclü rəqabət mühitində peşəkar jurnalistlər və rəqabət qabiliyyətli media yetişməkdədir. Sevindirici haldır ki, bu gün həm ənənələri yaşatmaqla, həm də dövrün tələblərinə riayət etməklə məhz müasir dövrün media modelini qura bilmiş xeyli sayda media orqanlarımız var.

Bu sözləri ölkəmizdə milli mətbuatın inkişafı ilə bağlı Publika.az-a fikirlərini bölüşən, əmək fəaliyyətinin ilk illərində jurnalist fəaliyyətilə məşğul olmuş millət vəkili Bəhruz Məhərrəmov deyib.

B.Məhərrəmov bildirib ki, Azərbaycanın İkinci Qarabağ müharibəsini qələbə ilə başa vurmasının əsas səbəblərindən biri məhz əzmkar informasiya savaşı nümayiş etdirməsi olub: "Güclü jurnalistika güclü dövlətçilik deməkdir. Müharibədə qalib gəldiyimiz kimi, informasiya savaşında da qalibiyyətimizin davamlılığını təmin etmək üçün bizim əqidəli, qərəzsiz milli jurnalistikaya ciddi ehtiyacımız var. Qalib ölkənin mediası da, jurnalisti də qalib kimi davranmalıdır".

"Təəssüf ki, eyni zamanda, "bəşəri ideallar", "azad söz" və "yaradıcılıq azadlığı" pərdəsi altında pozucu meyillər də müasir mediada ciddi vüsət alıb. Xüsusən, xaricdən maliyyələşən və antimilli mövqeli muzdlu media formalaşıb. Əlbəttə, ilk növbədə bu tendensiyalara son qoyulması, peşəkarlığın və peşə etikasına sədaqətin ön plana keçdiyi, dövlətçiliyə ali dəyər kimi yanaşan media strukturlarının sayının artmasına ciddi ehtiyac var", - millət vəkili əlavə edib.

Deputat sonda Milli mətbuatın yaranmasının 148-ci ildönümü münasibətilə Azərbaycanın media işçilərini təbrik edib:

"Milli mətbuatın yaranma günündə mən müzəffər ölkənin hər bir jurnalistinə cansağlığı, yaradıcılıq uğurları, xoş, firavan həyat, o cümlədən daim qalib olmağı, bütün media orqanlarına isə uğurlu fəaliyyət arzu edirəm".

Mehti Kamiloğlu