Hərbi eskalasiya ehtimalı güclənir: Azərbaycan Ordusu hazır olmalıdır

“Ermənistanın Azərbaycanla razılaşdırılmadan bizim sərhədlərimizə gətirdiyi tırların ölkəmizə keçə bilməməsinin ardından saxta blokada şousu davam etdi və nəticədə BMT Təhlükəsizlik Şurasında müzakirəyə çıxarıldı. Müzakirələr bir nəticə vermədi. Hər hansı qətnamə qəbul olunmadı”.

Publika.az-a danışan politoloq İlyas Hüseynovun sözlərinə görə, Ermənistan qətnamə qəbul olunması üçün çox çalışıb:

“İndi isə Nikol Paşinyan blokada ilə bağlı müzakirələrin keçirilməsini uğurlu adlandırıb. Lakin burada heç bir uğurdan söhbət gedə bilməz. Azərbaycan reallıqları beynəlxalq auditoriyanın diqqətinə çatdırdı. Azərbaycanın BMT dəki nümayəndəsi Yaşar Əliyev çox ətraflı şəkildə regiondakı proseslər haqqında məlumat verdi və foto faktlarla sübut elədi ki, əslində Xankəndi və ətraf bölgələrdə heç də blokada yoxdur. Əksinə, müxtəlif tədbirlər, ad günləri, böyük dəbdəbə ilə keçirilir”.

Politoloq bildirib ki, diplomatik və hüquqi sahədə Ermənistanın fəaliyyəti fiaskoya uğradıqdan sonra hərbi təxribatlar baş verə bilər:

“Çünki son dövrlər Naxçıvan Muxtar Respublikası, Ermənistan və Azərbaycanın şərti sərhədi və müvəqqəti olaraq Azərbaycan ərazisində yerləşmiş Rusiya sülhməramlıları olan bölgədə aktivlik müşahidə olunur, fortifikasiya qurğularını təsis etməyə cəhd göstərirlər.

Bununla yanaşı olaraq səngərlər qazırlar və bunların da qarşısı uğurla alınır. Ona görə də növbəti mərhələdə hərbi eskalasiya ehtimalı güclənir. Ermənilər çox çalışırdı ki, hansısa qətnamə qəbul olunması ilə Azərbaycana təzyiqlərini artırsınlar. Bunu əldə etmədikdə, əlbəttə ki, ənənələrinə sadiq qalaraq vəziyyəti gərginləşdirməyə çalışırlar. Ümid edirəm ki, bunun da qarşısı alınacaq. Hər üç istiqamətdə Azərbaycan öz fəaliyyətini gücləndirməli və ordumuzun birləşmələri ayıq-sayıq olmalıdır”.

Nəzrin