Bakı görüşü: Həsənov və Gülər Burçuladzedən nə istəyib?

Azərbaycan, Türkiyə və Gürcüstan müdafiə nazirlərinin Bakı görüşü ənənəvi üçtərəfli formatın davam etdirilməsi olsa da, İrəvana silah daşınmasında Tbilisinin tranzit olaraq istifadə edilməsi fonunda müəyyən gözləntilər yaradır.

İstisna deyil ki, Bakıda bu məsələ də müzakirə edilib, Gürcüstandan tranzit rolundan imtina etməsi, yaxud ən azı Ermənistanın hərbi gücünü artıra biləcək, eləcə də təhlükə yaradacaq hücum silahlarının keçidinə icazə verilməməsi istənilib. Regional təhlükəsizlik məsələlərində Bakı və Ankara ilə müttəfiqlik edən Tbilisinin bunu qəbul edəcəyi mümkün görünür.

Fransanın Gürcüstan vasitəsilə Ermənistana göndərdiyi “Bastion” zirehli maşınları Azərbaycan üçün təhlükə yaratmır. Bu baxımdan, rəsmi Bakı Avropa İttifaqından müəyyən gözləntiləri olan Tbilisinin bu addımını anlayışla qarşılayıb. Lakin Ermənistanı silahlandırmağa davam edəcək Fransanın perspektivdə ağır hərbi texnikanı da Gürcüstan üzərindən keçirmək istəyəcəyi bəllidir. Bakı və Ankara Tbilisidən bunun olmamasını istəyir.

Azərbaycan müdafiə naziri Zakir Həsənov, Türkiyənin müdafiə naziri Yaşar Gülər və Gürcüstanın müdafiə naziri Cuanşer Burçuladzenin birgə əməkdaşlıq istiqamətlərinin nəzərdə tutulduğu sənədə imza atması bu baxımdan da əhəmiyyətlidir.

Asif Nərimanlı