Rusiya Ermənistanı izləyir: Türkiyə dərhal hərəkətə keçməlidir ki...

"Bu irəliləyiş Cənubi Qafqazda sülhün bərqərar olması üçün son dərəcə vacibdir. Təkcə əsirlərin mübadiləsi üçün deyil, həm də Azərbaycan və Ermənistanın bəzi beynəlxalq forumlarda bir-birini dəstəkləməsi son dərəcə vacibdir".

Bunu Publika.az-a açıqlamasında türkiyəli siyasətçi və yazar Aydın Sezər deyib. O bildirib ki, Ermənistanın Qərblə olan münasibətləri Rusiya tərəfindən izlənilir:

"Bildiyimiz kimi, Cənubi Qafqazda Ermənistan ilk növbədə Rusiyanın nəzarəti altında idi və Rusiya siyasətinə uyğun siyasət aparırdı. Sonralar, xüsusən də Azərbaycan-Ermənistan müharibəsindən sonra biz Qərb dövlətlərinin, xüsusilə Avropa Birliyinin Ermənistana təsirini görməyə başladıq. Ona görə də Paşinyanın vəzifədə qalıb-qalmaması Ermənistanın gələcəyi üçün son dərəcə vacibdir. Açığı, mən hesab edirəm ki, Ermənistanın və Paşinyanın başına Ukraynadakı kimi bir hadisənin, müharibə olmasa belə, Rusiya ilə qarşıdurmanın gəlməsi sülhü təhdid edəcək. Ermənistanın Qərblə münasibətləri Rusiya tərəfindən çox diqqətlə izlənilir. Bu baxımdan Türkiyənin xüsusilə Ermənistanla ən qısa zamanda sülh mühiti yaratması, həm Türkiyənin Cənubi Qafqazda təsirini artıracaq, həm də müəyyən mənada Ermənistanın Rusiyaya qarşı sığortası olacaq".

Politoloq hesab edir ki, Paşinyan Qərbin və ya diasporun təsiri altında olsa da, Azərbaycan və Türkiyə ilə barışıqda son dərəcə qətiyyətlidir:

"Ona görə də, Ermənistanda vaxtaşırı Paşinyana qarşı nümayişlər olur. Bu, hətta rusiyayönlü keçmiş hərbi xadimlərin və ya qüvvələrin tənqidinə səbəb olur. Odur ki, bu baxımdan verilən birgə bəyanat həm Paşinyanı ruhlandıracaq, həm də regionda daimi sülh əldə olunanda erməni xalqının rifahının yüksəlməsi ilə bağlı müsbət nəticələr verəcək. Bildiyiniz kimi, Paşinyan bu yaxınlarda nəqliyyat marşrutları ilə bağlı layihəsini açıqladı və biz görürük ki, bunların hamısı Azərbaycanla münasibətlərin yaxşılaşdırılmasına, sülhün bərqərar olmasına yönəlib. Ona görə də burada kritik olan Ermənistanın daxili siyasəti baxımından Paşinyanın gələcəyi ilə bağlıdır".

O qeyd edib ki, bu son hadisə Cənubi Qafqazda daimi sülhə gedən yolda çox mühüm, ümidverici və sevindirici irəliləyişdir:

"Bunu açıq şəkildə qeyd edək. Amma yenə deyirəm, Paşinyanın Rusiya, Qərb və ya diasporla münasibətləri ilə bağlı balans dünənki birgə bəyanatda qeyd olunan məsələlərin gələcəyi üçün son dərəcə vacibdir. Ancaq Ermənistanın daxili siyasətində baş verən proseslərə nəzər salaraq şərh verə biləcəyik. Açığı, Ermənistanın daxili siyasətinin bu birgə bəyannaməyə necə reaksiya verəcəyini səbirsizliklə gözləyirəm. Bu səbəbdən yaxın bir neçə gündə hadisələrin necə cərəyan edəcəyini izləyəcəyik".

Nəzrin Cavadzadə