Moskva qəbul etdi: Rusiyadakı azərbaycanlılarla bağlı bu addım atılacaq

Düşənbədə Prezident İlham Əliyevlə rusiyalı həmkarı Vladimir Putinin görüşü Azərbaycan və Rusiya arasında son 10 ayda – ötən ilin dekabrında bakıdan Qroznıya uçan AZAL təyyarəsinin vurulmasından etibarən başlanan “əsəb müharibəsi”nə son qoydu.

Moskva vurulan təyyarə ilə bağlı Bakının bütün tələblərini qəbul etdi: kompensasiya ödəniləcək və günahkarlar cəzalandırılacaq.

Lakin Rusiyanın atmalı olduğu addım bununla yekunlaşmır. Təyyarə böhranının həllindən sonra əsas gözlənti Moskvanın hədəf kimi seçdiyi soydaşlarımıza qarşı haqsız təqibləri dayandırmasıdır. Son 10 ayda Rusiyada Azərbaycan diasporunun rəhbərləri və icma üzvləri – azərbaycanlı kimliyinə məxsus bütün şəxslər ciddi təzyiqlə üzləşib, onlarla soydaşımız həbs olunub. Mümkündür ki, Rusiyada həbs olunan və qeyri-qanuni təqiblərə məruz qalan soydaşlarımıza qarşı addımlar yaxın dövrdə dayandırılacaq.

Çünki Rusiya soydaşlarımızı məhz Azərbaycanla apardığı “əsəb müharibəsi”nə görə təqib edirdi və rəsmi Bakının əsas tələblərindən biri də bu addımların dayandırılması idi. Bu məsələnin ikitərəfli təmasların əsas gündəminə daxil edildiyi də istisna edilməməlidir. Hətta prosesə strat verildiyini də demək mümkündür.

Bu kontekstdə Rusiya prezidentinin köməkçisi Yuri Uşakovun açıqlaması diqqət çəkir. Uşakov bildirib ki, Bakıda həbs edilən “Sputnik Azərbaycan”ın icraçı direktoru İqor Kartavıx sərbəst buraxılıb, eyni zamanda, Rusiyada həbs olunan Azərbaycan vətəndaşlarından biri azad edilib.

Asif Nərimanlı