Ordumuzun nəzarəti, ermənilərin kütləvi köçü... - Göyçədə real vəziyyət necədir?

Ermənistan mediasının Göyçə mahalından hazırladığı reportaj Azərbaycanın tarixi torpaqlarındakı real mənzərə ilə tanış olmaq baxımından diqqət çəkir.

Publika.az xəbər verir ki, “hetq.am” saytı Qeqrkunik (Göyçə) rayonunun Kaxek kəndindəki vəziyyəti işıqlandırıb.

Reportajda diqqətçəkən iki məqam var.

Birincisi, Azərbaycan ordusunun mövqeləridir: 2022-ci il sentyabr döyüşlərində nəzarəti bərpa etdiyimiz mövqelər Kaxek kəndi də daxil olmaqla, bölgəni izləmək imkanı yaradır.

İkincisi, Kaxek kəndi, ümumilikdə sərhədyanı bölgələrdə erməni əhalisinin sürətlə azalmasıdır.

Kənd sakini Artur dağları göstərərək, bildirir ki, əvvəllər Ermənistan ordusunun postları bu təpələrin başında idi: “İndi azərbaycanlılar oradadır, bizimkilər aşağıda. Erməni mövqeləri kəndin mərkəzindən düz xətt üzrə 3-3,5 kilometr, Azərbaycan mövqeləri isə 5 kilometr məsafədədir. Gündüzlər azərbaycanlıları aydın şəkildə görə bilirik, onlar da ətrafı adi gözlə izləyə bilirlər”.


Deportasiyaya məruz qalan azərbaycanlıların evləri

Erməni sakin etiraf edir ki, artıq kənddə, eləcə də ümumilikdə sərhədboyu ərazilərdə əhalinin sayı sürətlə azalır.

“2022-ci ildən sonra otlaqlar neytral zonaya çevrildi. Mal-qaranın sayı 50 faiz azalıb. Kəndin əhalisinin böyük hissəsi evlərini tərk ediblər. Gənclər də iş olmadığı üçün gedirlər. Buranın gələcəyi yoxdur”, - o bildirib.

Bu reportaj Azərbaycanın tarixi torpaqlarındakı vəziyyəti anlamağa imkan verir. Azərbaycanlılar öz yurdlarından deportasiya edildikdən sonra müxtəlif ərazilərdə ermənilər boş qalmış evləri mənimsəsə də, ərazilərin böyük hissəsi boş qalıb. Son dövrlər isə Qərbi Azərbaycanın sərhədə yaxın ərazilərində erməni əhalisinin sayı sürətlə azalır. Bu isə o deməkdir ki, azərbaycanlıların öz yurdlarına qayıdışının erməni əhalisinin həyatına mənfi təsiri olmayacaq, əksinə, Qərbi Azərbaycana qayıdış bölgədəki demoqrafik və sosial-iqtisadi vəziyyəti daha da yaxşılaşdıra bilər.

Asif