Misir portalı Azərbaycanın Vətən müharibəsində qələbəsindən yazdı

Misirin “Zat Masr” informasiya portalı Milli Məclisin deputatı Nigar Arpadarainin Azərbaycan Ordusunun Vətən müharibəsində Qələbəsi və Ermənistanın təxribatları haqqında geniş müsahibəsini yayıb.

AZƏRTAC xəbər verir ki, N. Arpadarai misirli jurnalistə Azərbaycan Ordusunun torpaqlarımızın 30 ildir davam edən işğalına son qoyduğunu, beləliklə, BMT Təhlükəsizlik Şurasının ədalətli qətnamələrini yerinə yetirdiyini, ermənilərin işğal etdikləri ərazilərimizdə məscidləri təhqir etdiyini söyləyib. Qeyd edib ki, indi Azərbaycanın qarşısında duran əsas vəzifə ermənilərin vəhşicəsində dağıtdıqları yaşayış məntəqələrinin, o cümlədən “Qafqazın Xirosiması” adı verilən Ağdam şəhərinin bərpası və insanların öz doğma yurdlarına qayıtmasının təmin edilməsidir.

Deputat ATƏT-in Minsk qrupunun həmsədri olan və Azərbaycanın ərazi bütövlüyünü rəsmən tanıyan Fransanın ermənipərəst mövqeyini qətiyyətlə pisləyib, rəsmi Parisin bu məsələdə neytral olmasının zəruriliyini qeyd edib. O, həmçinin Azərbaycanın Vətən müharibəsində Suriyadan gəlmiş silahlıların döyüşməsi xəbərlərini də qətiyyətlə təkzib edib və bunu ermənilərin və onların havadarlarının növbəti yalanı kimi səciyyələndirib. Əlavə edib ki, qüdrətli və ən müasir silahlarla təchiz edilmiş Azərbaycan Silahlı Qüvvələri ən çətin tapşırıqları yerinə yetirməyə qadirdir. Əksinə, Ermənistanın tərəfindən Yaxın Şərq ölkələrindən gətirilmiş muzdlu əsgərlərin döyüşdüyü danılmaz bir faktdır.