Elçin Mirzəbəyli - Himnimizdə gəncliyin adı xüsusi vurğulanır

Vətən müharibəsində Azərbaycan gənclərinin üzərinə çox böyük yük və məsuliyyət düşürdü. Onlar bu yük və məsuliyyətin öhdəsindən şərəf və ləyaqətlə gəldilər. Gənclik bizim gələcəyimiz və fəxrimizdir.

Bu sözləri Publika.az-a açıqlamasında politoloq Elçin Mirzəbəyli deyib. O bildirib ki, Azərbaycan gəncliyinin bu gün önə çıxması gənc Azərbaycan dövlətini simvolizə edən çox önəmli faktordur:

“Təsadüfi deyil ki, himnimizdə də məhz gəncliyin adı xüsusi vurğulanır. Azərbaycanın mental xüsusiyyətlərində, eyni zamanda dövlətçilik ənənələrində gənclik hər zaman ön planda olub. Bundan sonra da şübhəsiz ki, belə olacaq. Cənab Prezident dövlətçilik ənənələrindən çıxış edərək Azərbaycan gəncliyinə etimad göstərir.

Nəsillər dəyişir və müəyyən mərhələdə gənclər önə çıxır. Ölkənin, xalqın taleyi ilə bağlı məsələlərdə məsuliyyətin əhəmiyyətli hissəsi onların üzərinə düşür. Vacib şərtlərdən bir də təcrübəli insanlarla, yaşlı və orta yaşlı nəsillə gənclik arasındakı mənəvi körpülərin qırılmamasıdır. Bu, vacib faktorlardan biridir. Dövlətçilik ənənələrində vərəsəlik prinsipinin pozulması nəticə etibarı ilə dövləti ciddi problemlərlə qarşı-qarşıya qoyur, ənənələri sıradan çıxarır. Nəsillər arasındakı körpünün sıradan çıxması toplumun, xalqın yeni nəslini keçmişindən, tarixindən ayırır və silahsızlaşdırır. Düşünürəm ki, Azərbaycan gəncliyi dövlətimizin, xalqımızın dinamik və çevik hərəkət edən hissəsidir. İnkişafımızın yeni mərhələsində onların üzərinə böyük yük düşür. Amma bütün məqamlarda birlikdə güclü olduğumuz kimi, gənc, orta və yaşlı nəslin nümayəndəsi olaraq birlikdə güclüyük və hədəflərimizə doğru birlikdə addımlamalıyıq”.

Aytən Məftun