Laçınlılar qayıtdıqdan sonra oranı cənnətə çevirəcəklər – RƏY

Bu gün Laçının işğal günüdür. 1992-ci ilin yazında, Şuşanın işğalından cəmi 10 gün sonra Laçın rayonu erməni terrorçu birləşmələri tərəfindən işğal edildi. 28 il ərzində düşmən tapdağında inildədi. Ötən ilin 1 dekabrında isə bir güllə atılmadan azad olundu. Şübhəsiz ki, bu, 44 günlük müharibədə düşmənin acı məğlubiyyətindən sonra baş verdi.

Əvvəlki illərdən fərqli olaraq builki anım günü fərqli ab-havada qeyd olunur.

Prezident İlham Əliyev düşmən tapdağından qurtulan Laçına getdi, yenidənqurma işlərinə start verdi. Laçınlılar isə 28 illik həsrətdən sonra tezliklə öz yurd-yuvalarına qayıtmağı gözləyirlər.

Milli Məclisin deputatı, Azərbaycan Demokratik İslahatlar Partiyasının (ADİP) sədri Asim Mollazadə Publika.az-a açıqlamasında söyləyib ki, hazırda Azərbaycan xalqının qarşısında “Böyük qayıdış” planını sürətlə həyata keçirmək kimi bir məsələ durur:

“Mən əminəm ki, bizim xalqımızın qüdrəti nəticəsində bütün işğaldan azad olunmuş ərazilərimizdə infrastruktur layihələri həyata keçiriləcək. Böyük inşa işləri gerçəkləşdiriləcək. Laçınlılar öz yurd-yuvalarına qayıdacaqlar. Onlar öz doğma yurdlarında vətənin gücünün hesabına yenidən bu rayonu bir cənnət bölgəsi kimi inkişaf etdirməyə çalışacaqlar. Qarabağ Azərbaycandır! Laçın da bu bölgənin ən gözəl guşələrindən biridir”.

Tural Turan