Azay Quliyev: Bu qanun layihəsi dostlarımızı sevindirəcək

Bu gün bizi Şuşanı və bütün torpaqları erməni vandallarından təmizləyən Cənab Prezidentin daha bir tarixi qərarını parlamentdə müzakirə edirik.

Publika.az xəbər verir ki, bu sözləri Milli Məclisdə deputat Azay Quliyev “Azərbaycanın mədəniyyət paytaxtı – Şuşa şəhəri haqqında” qanun layihəsinin müzakirəsi zamanı deyib.

O, əlavə edib ki, Prezident İlham Əliyevin Şuşanın Azərbaycan mədəniyyət paytaxtı elan etməsi və Xarı bülbül festivalından sonra belə qanun layihəsi ilə çıxış etməsi gördüyü işlərin məntiqi davamıdır: “Bu layihə Prezidentin Şuşada verdiyi “Biz Şuaya qayıtdıq və burada əbədi yaşayacağıq” bəyanatının məntiqi davamı, Azərbaycan iqtidarının tarixi irsimizə sahib çıxmasının göstəricisidir”.

Deputat deyib ki, bu qanunu qəbul etməklə işğaldan azad edilən ərazilərə böyük qayıdışın necə olduğunu ortaya qoyur, eyni zamanda bu ərazilərin perspektivini nümayiş etdirir: “Düşünürəm ki, Şuşanın mədəniyyət paytaxtı kimi statusunu və təhlükəsizliyi möhkəmləndirən qanun layihəsi dostlarımızı sevindirdiyi kimi düşmənləri narahat edəcək”.