ANS-ə maliyyə yardımı bərpa edildi

Milli Televiziya və Radio Şurası (MTRŞ) milli televiziya filmlərinin çəkilişi ilə əlaqədar ANS televiziyasına maliyyə yardımının ayırması haqqında qərar qəbul edib.



Bu barədə AzNews.az-a MTRŞ sədri Nuşirəvan Məhərrəmli bildirib. O vurğulayıb ki, bir müddət öncə bəzi mövcud nöqsanlarla bağlı filmlərinin çəkilişi ilə əlaqədar ANS televiziyasına maliyyə yardımının dayandırılması ilə bağlı qərar qəbul edilsə də, sonradan tərəflər arasında razılaşma olub:

“Bununla bağlı ANS rəhbərliyi ilə görüşlər keçirtdik və mövcud nöqsanlar aradan qaldırılması haqqında razılığa gəldik. ANS bəzi məsələləri artıq yoluna qoyub. Bu həftə ərzində bu iş tam başa çatdırıldıqdan sonra ANS kanalına milli televiziya filmlərinin çəkilişi üçün vəsait ayrılacaq”.

Xatırladaq ki, ötən ayın 22-də Nuşirəvan Məhərrəmli Milli Televiziya və Radio Şurası (MTRŞ) milli televiziya filmlərinin çəkilişi ilə əlaqədar ANS televiziyasına maliyyə yardımını dayandırılması ilə bağlı açıqlama vermişdi. O buna səbəb kimi ötən ilin aprelində televiziya kanallarına ayrılan 6 milyon manat vəsait ANS televiziya kanalı tərəfindən təyinatı üzrə xərclənməməsini göstərmişdi.