Qəhrəmanova Milli Fəaliyyət Planından danışdı

Azərbaycanda BMT Təhlükəsizlik Şurasının 1325 saylı qətnaməsinin Milli Fəaliyyət Planı hazırlanır.

Publika.az xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova Bakıda keçirilən Azərbaycanda Qadın, sülh və təhlükəsizlik üzrə Birinci Milli Forumda deyib.

O bildirib ki, münaqişələr zamanı əziyyət çəkən daha çox mülki əhali, xüsusilə uşaqlar və qadınlar olur: “Bəzən müharibədə hərbçilər müharibə qaydalarını pozaraq mülki obyektləri atəşə tuturlar. Azərbaycan 44 günlük müharibədə bütün müharibə qaydalarına əməl edən bir ölkə kimi nümunə göstərdi. Ancaq çox təəssüf ki, Ermənistan tərəfi mülki əhalimizə atəş açaraq münaqişə zonasından uzaqda yerləşən şəhərlərimizi, qəsəbələrimizi və kəndlərimizi raket atəşinə tutaraq mülki insanları qətlə yetirdi. Bu qaydaları pozan dövlətlər öz cəzalarını ən ağır formada almalıdır, beynəlxalq təşkilatlar bu məsələyə münasibət bidirməlidir”.

S.Qəhrəmanova əlavə edib ki, yeni hazırlanan Milli Fəaliyyət Planı bu yaxınlarda Nazirlər Kabinetinə göndəriləcək.