Şəhid övladları naziri kövrəltdi - Türk millət vəkilindən ÖZƏL AÇIQLAMA

“Şəhid övladlarının “bizi bir daha atasız qoyma” mesajları mənə çox təsir etdi”.

Publika.az xəbər verir ki, bu sözləri Türkiyənin Daxili İşlər naziri Süleyman Soylu “A Haber” proqramına özəl açıqlamasında deyib.

Ötən gecə istefa verməsi ilə bağlı danışan nazir bildirib ki, şəhid övladlarının ona yazdığı mesajlar qəlbinə toxunub: “Millətimizin yaxşı niyyətdən şübhə duymaması məni qürurlandırdı”.

Qeyd edək ki, Soylu ölkədə 2 gün küçəyə çıxma qadağasının sosial böhrana çevrilməsinə görə ötən gecə postundan istefa verdiyini açıqlamış, lakin Prezident Rəcəb Tayyib Ərdoğan onun istefa ərizəsini qəbul etməmişdi.

Ədalət və İnkişaf Partiyasının Ərzurum millət vəkili İbrahim Aydəmir mövzu ilə bağlı Publika.az-a açıqlamasında bildirib ki, Türkiyə bu istefanı heç elan edilməmiş qəbul edir: “Ədalət və İnkişaf Partiyasında cənab prezidentin qənaəti bütün müzakirələrə nöqtə qoyur. Bu dəfə də elə oldu. Cənab Soylunun məsuliyyəti üzərinə götürmək üçün verdiyi açıqlama prezidentin “davam” qərarı ilə bitib”.

Zümrüd