HDP-li millət vəkili HƏBS EDİLDİ

Mandatı ləğv edilən və barəsində həbs qərarı verilən HDP-li millət vəkili Leyla Güvənin yaxalanması üçün Diyarbəkir Polis Şöbəsinin əməkdaşları bütün günü əməliyyat keçiriblər.

Publika.az "TRT Haber"ə istinadla xəbər verir ki, ehtimal edilən ünvanlarda axtarış aparan polislər HDP-nin Diyarbəkirdən olan millət vəkili Gözəlin iqamətgahına baxış keçiriblər. Leyla Güvən burada tapılaraq həbs edilib.

Həbs qərarı üzünə oxunan Güvən birbaşa cəzaçəkmə müəssisəsinə aparılıb.

Bildirək ki, Diyarbəkir 9-cu Ağır Cəza Məhkəməsi HDP-nin sabiq Hakkari millət vəkili Leyla Güvəni Türkiyə Silahlı Qüvvələrinin (TSK) Suriyanın Afrin bölgəsində apardığı "Zeytun Budağı" Əməliyyatı ilə əlaqədar verdiyi açıqlamaya və etdiyi paylaşımla, daha öncə qatıldığı toplantılarda terroru dəstəkləyən çıxışlarından dolayı "silahlı terror təşkilatına üzv olmaq", 2 dəfə "terror təşkilatının propaqandasını aparmaq" cinayətlərinə görə 22 il 3 ay həbs cəzasına məhkum olunmasına dair qərar vermişdi.