Ordu hazır vəziyyətə gətirildi: Rusiya hərəkətə keçir?

Türk siyasi ekspert Taha Dağlı bildirib ki, Rusiya ordusunun mümkün hücum həmləsində ilk hədəfi Ukraynanın Mariupol şəhəri olacaq.

Publika.az xəbər verir ki, Dağlı təhlil yazısında Rusiyanın nəzarəti altında olan iki bölgə arasında qalan Mariupolun 2014-cü ildə Rusiya üçün yarımçıq bir əməliyyat olduğunu qeyd edib.

Taha Dağlının yazısını təqdim edirik:

Qara dənizdə müharibə zilləri çalınır. Ukrayna Müdafiə Nazirliyi və kəşfiyyatı Rusiyanın işğala hazırlaşdığı barədə xəbərdarlıq edib. Meydandakı mənzərə də müharibəyə hazırlıqdan xəbər verir.

On minlərlə rus əsgəri Ukrayna sərhədində düzülüb. Bu rəqəmin 175 minə çatdığı iddia edilir.

Təhlükəsizlik ekspertləri Rusiyanın aylardır davam edən hərbi güclənməsinin nəticəsinin onun qismən münaqişə və işğala çevriləcəyinin göstəricisi olduğunu vurğulayırlar. Genişmiqyaslı müharibə əvəzinə, nöqtə atışı ilə qismən işğalın olacağı təhlil edilir.

Rusiya Mariupola göz dikdi

Bəs Rusiyanın hücum planında nə var?

Moskva Krım yarımadası ilə Rusiya arasında yerləşən Mariupol şəhərini işğal edə bilər. Bu, ruslar üçün prioritetdir. Rusiya 2014-cü ildə Ukraynada Qərbin dəstəklədiyi administrasiya dəyişikliyindən sonra Krımı və Donetski ələ keçirib, daha sonra Krımı ilhaq edib və onu öz xəritəsi ilə birləşdirib.

Ruslar o vaxt başqa yer tutmaq istəyirdilər. Bu, Mariupol şəhəri idi. Çünki Krımı alıb, oranı almamaq olmazdı. Rusiyadan Krım yarımadasına quru əlaqəsi Mariupol şəhərindən keçirdi. Lakin bu, olmadı. Mariupol o zaman işğal oluna bilməzdi.

Bunun üzərinə Rusiya Kerç boğazı üzərində körpü tikərək Krımla əlaqəni təmin etdi.

Yarımçıq qalan əməliyyat

Krımın və Kerç boğazının şimalında Mariupol şəhəri yerləşir. Mariupolun şimalında Donestk və Luqansk var. Mariupol Rusiya tərəfindən işğal edilmiş iki rayon arasında şəhərdir. Rusiya üçün bu, 2014-cü ildə yarımçıq qalmış əməliyyatdır. Bu gün iddia olunur ki, ruslar həmin yarımçıq əməliyyatı başa çatdırmaq üçün Mariupola soxulmağa hazırlaşır. Sahədəki hərbi sıxlığın və batalyonların taktiki formalaşdırılmasının hədəfində Mariupol olduğu bildirilir.

Təxmin edilən tarix - yanvarın sonu və ya fevralın əvvəli

Rusiya Ukrayna sahəsində genişmiqyaslı müharibə əvəzinə, qismən işğal planına diqqət yetirir. Genişmiqyaslı müharibəyə girməyin bədəli hər iki tərəf üçün ağır olacaq. Bu səbəbdən Rusiya 2014-cü ildə olduğu kimi, Mariupolu hədəf almağı məqsədəuyğun hesab edir.

Sahədəki güc nisbətlərinə baxanda rusların buna nail olmaqda əzmkar olduqları müşahidə edilir. Belə bir işğal üçün gözlənilən tarix yanvarın sonu və ya fevralın əvvəlidir.

Aİ və ABŞ-dan silahlara qarşılıq diplomatik həll axtarışı

Bəs Rusiya bunu etsə, nə olacaq? Rusiya NATO-ya qarşıdır. Bununla belə, Qərbdən gələn ritorika Rusiya üçün çəkindirici deyil. NATO, ABŞ və Aİ-nin bəyanatlarında həmişə eyni mesaj var - Ukraynaya qarşı təcavüz ağır qiymətə malik olacaq.

Bəs o qiymət nədir və nə qədər bahadır? Bu vəziyyət Rusiyanın iştahını oyadır.

Qərb Rusiyanı çəkindirmək üçün nə edə bilər? İndiyə qədər istifadə etdikləri ritorika sanksiyadır. Amma meydanda reallıq başqadır. Rusiya silahını çəkib və hərbi addıma hazırlaşır.

Digər tərəfdən, Qərb Rusiyanı sanksiyalarla qorxutmağa çalışır. Başqa sözlə, silahla bağlı diplomatik həll axtarışları var. Rusiya bundan qorxmur. Qərb isə başqa bir arqument irəli sürməkdə son dərəcə ehtiyatlı davranır.

Yalnız Böyük Britaniya sərt mesaj verir

ABŞ və Aİ Rusiyaya qarşı qoyacaq hərbi gücü özlərində görmürlər. Burada Böyük Britaniya bir az daha azaddır. Bu o deməkdir ki, Britaniya Rusiyaya qarşı digərlərindən daha sərt mövqe tuta bilər.

Moskvanı Ukraynadan uzaq tutmağın yeganə yolunun hərbi təhdid olduğunu başa düşən güc İngiltərə kimi görünür və ona uyğun mövqe tutmağa çalışır. Rusiya isə genişmiqyaslı müharibə aparmaq və bütün ildırımları üzərinə çəkmək əvəzinə, Mariupolu alıb Ukrayna ilə sərhəd təhlükəsizliyini tamamlamağı hədəfləyir. Bu yolla şərq bölgəsini tamamilə ələ keçirmiş bir ölkə kimi Ukraynanın NATO üzvlüyündən qaynaqlanan təhdidlərinin qarşısını almağa üstünlük verir.

Akqabay