Bu dəfə bəla GƏNƏDƏN GƏLİR: qanda leykositlərin sayı azalacaq, hərarət artacaq

Yaponiyada Ezo adlı yeni virusun səbəb olduğu indiyə qədər bilinməyən xəstəlik aşkar edilib. Mütəxəssislər virusun gənə dişləməsi ilə keçdiyini öyrəniblər.

Publika.az xarici KİV-ə istinadla xəbər verir ki, yapon alimləri tərəfindən aparılan araşdırmaların nəticələri "Nature Communications" jurnalında dərc edilib.

Yaponiyada naməlum patogenlə yoluxma halları ilk dəfə 2014 -cü ildə qeydə alınıb. 2020 -ci ilə qədər belə simptomları olan 7 xəstə qeydiyyata alınıb. Xəstəliyin gedişi qızdırma ilə xarakterizə olunub və xəstələrin qanında leykosit və trombositlərin sayı azalıb.

Yapon tədqiqatçılar iki xəstənin qan nümunələrindən virusu təcrid edə biliblər ki, bu da patojenin genetik analizinə imkan verib. Məlum olub ki, yoluxmuşların qanında əvvəllər məlum olmayan Ortonairovirus tipli bir patogen var. Konqo-Krım hemorragik qızdırma virusu da bu tipə aiddir.

2019-cu ildə gənə dişləməsindən qızdırması olan iki xəstə Hokkaydo xəstəxanasına müraciət edib. Qan analizi göstərib ki, bu insanlar naməlum virusa yoluxublar. Bundan sonra alimlər 2014 -cü ildə eyni simptomlarla müraciət edən xəstələrin qan nümunələrini yoxlayıblar. Tədqiqatçılar Ezo infeksiyasına 7 yoluxma halını müəyyən ediblər.

Tədqiqatçılar virusun mənbəyini tapmaq üçün bölgədəki vəhşi heyvanlardan götürülmüş nümunələri yoxlayıblar. 2010-2020-ci illərdə xallı maral və yenotdan toplanan nümunələrdən virusa qarşı antikorlar aşkar edilib. Tədqiqatçılar, Hokkaido bitlərinin əsas növlərində də virusun RNT-ni tapıblar.

Hüseyn