"Narahatıq!" - Həkim geri dönən qorxulu xəstəlikdən danışdı

2009-cu ildə pandemiyaya səbəb olan donuz qripi o zaman əhali arasında zəif olsa da, son aylarda naməlum səbəbdən yenidən baş qaldırıb.

Publika.az xəbər verir ki, bu sözləri biologiya elmləri doktoru, Corc Meyson Universitetinin (Virciniya, ABŞ) Sistem Biologiyası Məktəbinin professoru Ança Baranova Lenta.ru-ya deyib. Həkim açıqlamasında qriplə bağlı bu qəribəliklərə diqqət çəkib.

O vurğulayıb ki, hazırda qripin müxtəlif ştammlarına yoluxma hallarında kəskin artım müşahidə olunur. Adətən bu cür rəqəmlər yanvarın ortalarında qeydə alınırdı. Onun sözlərinə görə, qripə ən çox yoluxma adətən yanvar, fevral və ya mart aylarında olur. Mütəxəssis onu da vurğulayıb ki, hər mövsüm əhali arasında qripin bir neçə ştammı yayılsa da, onlardan biri daha təhlükəli hesab olunur.

"Bu il xalq arasında donuz qripi adlandırılan H1N1 (pdm09) virusu qeydə alınıb. Adındakı “09” rəqəmi o deməkdir ki, bu qrip ilk dəfə 2009-2010-cu illər mövsümündə aşkarlanıb, sonra donuz qripi pandemiyası başlayıb. Və bu mövsüm qəfildən baş qaldırıb. Rusiyada donuz qripi ilə bağlı vəziyyətdən narahatıq. Bu ştam sürətlə yayılır, bu gün 10 faiz, sabah isə 50 faiz", - bioloq əlavə edib.

Baranova qeyd edib ki, bu il əhali arasında COVID-19, qrip və respirator sinsitiya virusu eyni vaxtda dövr edir: "Vizual olaraq simptomların oxşarlığına görə xəstəliyi fərqləndirmək mümkün deyil. Qripə molekulyar diaqnoz qoymalıyıq, çünki bu dərmanı kovidli bir insana versəniz, ona kömək etməyəcək.

Əgər özünüzü nisbətən normal hiss edirsinizsə, lakin öskürək və burun axıntısı kimi soyuqdəymə əlamətləri varsa, bu, hər hansı bir tənəffüs yoluxucu infeksiya ola bilər. Xəstə nəfəs almaqda hər hansı bir çətinlik hiss edirsə və ya temperatur 39-40 dərəcədən yuxarıdırsa, o zaman həyəcan təbili çalmağa başlamalıyıq. Bu, artıq narahatlıq üçün bir səbəbdir".

Aytən Məftun