Əsl göz kimi hərəkət edən süni göz hazırlandı

Rusiyalı alimlər sağlam gözün hərəkətlərini təkrarlaya bilən yeni göz protezinin maketini hazırlayıblar.

Publika.az xəbər verir ki, bu barədə “RIA Novosti”yə layihə rəhbəri, Sankt-Peterburq Elektrotexnika Universitetinin (ETU "LETI") İnformasiya Ölçmə və Biotexniki Sistemlər fakültəsinin mühəndisi Roman Antonov bildirib.

Onun sözlərinə görə, layihə iki əsas hissədən ibarətdir: daxili mikromühərrikə malik göz protezi və çərçivəsinə mini-kamera quraşdırılmış eynək. Kamera sağlam gözün hərəkətlərini qeydə alır və məlumatı protezə ötürür. Mikromühərrik siqnalı qəbul etdikdən sonra protezi hərəkət etdirir və beləliklə, süni göz sağlam gözlə eyni istiqamətdə hərəkət edir.

Hazırda alimlər protezin laboratoriya maketini, struktur-funksional sxemini hazırlayıb və proqram təminatının ilkin versiyasını yazıblar.

Məlumatların ötürülməsi “Bluetooth” vasitəsilə həyata keçirilir və bu, simsiz qulaqlıqların işləmə prinsipinə bənzəyir. Protez bir dəfə enerji ilə doldurulduqdan sonra təxminən bir sutka işləyə bilir, onun gözlənilən istifadə müddəti isə 3-5 il təşkil edir.

Alimlərin sözlərinə görə, protez xüsusi polimer materialdan hazırlanıb. Bu material biouyğundur, nəmə və temperatur dəyişikliklərinə davamlıdır, həmçinin çox yüngül olduğu üçün göz qapaqlarının sürüşməsi və əzələ problemləri kimi fəsadların qarşısını alır.