6 ayda Azərbaycana 192 ölkədən giriş olub

2026-cı ilin ilk 6 ayı ərzində ölkəyə 192 ölkənin vətəndaşı tərəfindən ümumilikdə 1 091 865 giriş qeydə alınıb.

Publika.az xəbər verir ki, bunu “Miqrasiya sahəsində media məlumatlılığı" mövzusunda mediatur çərçivəsində Dövlət Miqrasiya Xidmətinin rəisi Vüsal Hüseynov deyib.

Onun sözlərinə görə, ölkəyə ən çox səfər edən vətəndaşların mənsub olduqları ilk beş ölkə Rusiya, Türkiyə, Gürcüstan, İran və Qazaxıstandır.

“Cari ilin ilk 6 ayı ərzində Xidmətə müxtəlif istiqamətlər üzrə 420.961 müraciət daxil olub. Müraciətlərin 55.8 faizi elektron qaydada qəbul edilib. Elektron müraciətlərin 69,8 faizi üzrə müraciət müəllifləri müraciətlərinin nəticəsini sistem vasitəsilə real vaxt rejimində əldə ediblər.

Əcnəbilərin və vətəndaşlığı olmayan şəxslərin olduğu yer üzrə qeydiyyatı ilə bağlı 149 714 müraciət daxil olub.
Yaşama icazələrinin verilməsi və müddətinin uzadılması ilə bağlı ümumilikdə 38.884 müraciət qəbul edilib”.

Vüsal Hüseynov qeyd edib ki, cari ilin ilk 6 ayında Azərbaycana digər ölkələrdən giriş edənlərin sayı ötən ilin ilk 6 ayı ilə müqayisədə azalıb:

“Bu, BƏƏ, Oman, Küveyt və Hindistandan gələnlərin sayında daha çox müşahidə olunub. İlin sonuna qədər bu statistika dəyişə bilər”.

Müəllif: Roza Şəfiyeva