ƏSA Teatrı “And”la tamaşaçıların görüşünə gələcək

Azərbaycanın ilk inklüziv teatrı olan ƏSA Teatrı böyük fransız komediya yazarı Molyerin “Xəsis” əsəri əsasında “And” dramatik-komediyasını təqdim edəcək.

Publika.az xəbər verir ki, bu tamaşa 2020-ci ildə respublika üzrə yeganə premyera edən səhnə əsəridir. 9 martda baş tutacaq nümayiş sayca ikincidir.

Molyerin “Xəsis” komediyasında hadisələr orta əsrlər Parisində baş verir. Varlı və xəsis Qarpaqonun iki övladı var: Kleant və Eliza. Kleant anasıyla kasıb həyat tərzi yaşayan Mariana adlı xanımla evlənmək istəyir, Eliza isə atasının qulluğunda duran Valer adlı xidmətçiyə aşiqdir. Uşaqlarının sevgi macəralarını bilməyən Qarpaqon isə onları varlı insanlarla evləndirmək istəyir. Oğlunun sevdiyi Mariananı isə hiyləgər Frozina sayəsində özünə gəlin gətirmək arzusundadır.

ƏSA Teatrının hazırladığı “And” tamaşasında isə bugünədək səhnəyə qoyulmuş “Xəsis” əsərinə tamamilə yeni rakursdan baxılaraq, baş qəhrəman – Qarpaqonun ikrah hissi yaradan şəxsi keyfiyyətləri və xəsisliyi deyil, insanların şəxsi mənafe naminə qurduqları münasibətlərin ifşası ortaya qoyulub. Tamaşanın sonunda hər kəsin xəsis kimi gördüyü Qarpaqonun illər əvvəl verdiyi andın nə olduğunu bilirik.

Tamaşanın müəllifi və quruluşçu rejissoru Nihad Qulamzadə, prodüseri isə Nicat Qulamdır. Rollarda Elşən Əsgərov, Səmayə Ağayarova, Lalə Süleymanova, İmran Lalayev, Elsevər Rəhimov, Aysel Feziyeva, Cəmilə Məmmədli, Könül Şahbazova, Rafael Şahbəyli, Elvin Mirzəyev, Orxan Əliyev, Bəhram Rəhimli, Rəsul Zəkiyev, Günay Məmmədova və Fərid Əliyev iştirak edir.