Xüsusi

O, Azərbaycanda gözübağlı şəkildə bunu edərək göstərdi ki... - Baba Məmmədovla MÜSAHİBƏ

11 Aprel 2022 11:43

Budəfəki həmsöhbətimiz Azərbaycan Vinq Çun Federasiyasının İctimaiyyətlə əlaqələr və marketinq şöbəsinin müdiri Baba Məmmədovdur.

Baba Məmmədov 2007-2011-ci illərdə Azərbaycan Dövlət İqtisad Universitetinin (UNEC) Ümumi iqtisadiyyat fakültəsinin bakalavr pilləsini fərqlənmə diplomu ilə bitirib. 2017-2019-cu illərdə UNEC-in Beynəlxalq Magistratura və Doktorantura Mərkəzinin Makroiqtisadi siyasət ixtisaslaşması üzrə magistr pilləsini fərqlənmə diplomu ilə bitirib. 2021-ci ildə UNEC BMDM-ə doktoranturaya qəbul olub, tədqiqatçıdır. Eyni zamanda idmançıdır, Bakı və respublika çempionatlarının qalibidir.

Publika.az">Publika.az Baba Məmmədovla müsahibəni təqdim edir:

- Baba müəllim, necə oldu Vinq Çun Federasiyası ilə tanış oldunuz?

- Sözü federasiyanın prezidenti Asif Sayadovla başlamaq istəyərdim. Asif müəllimi 2003-cü ildən tanıyırdım. O, Kunq-fu döyüş sənətinin digər növü ilə məşğul olub. Mən də onun dostları vasitəsilə təsadüfən xəbər tutdum ki, o, bu idman növü ilə məşğuldur. O vaxt hələ 13 yaşım var idi və o gördü ki, mən öz məhəlləmizdə idman hərəkətləri edirəm və beləcə diqqətini çəkmiş oldum. Onun yaxın dostları eyni zamanda mənim də tanışlarım idi. Beləcə, Asif Sayadov məni də idmanla məşğul olmaq üçün yanına dəvət etdi və elə o gündən onunla bir yerdəyəm. Kunq-funun digər qolları ilə də məşğul idim. Lakin Vinq Çun döyüş sənəti ilə 2008-ci ildən etibarən klub şəklində fəaliyyət göstərdik, 2018-ci ildən etibarən isə tam federasiya şəklində fəaliyyətimizi davam etdirdik. Dünyada 350 illik tarixi olan bir döyüş sənətidir, şükürlər olsun ki, Azərbaycanda da Asif Sayadovun sayəsində öz fəaliyyətini davam etdirir.

- Beynəlxalq tədbirlərdə iştirak etmək üçün hansı tədbirlər görülür, eyni zamanda qarşıdan federasiyanın 4 yaşı gəlir, bu münasibətlə hansı işlər reallaşdırılır?

- Mən İctimaiyyətlə əlaqələr və marketinq şöbəsinin müdiriyəm, Asif Sayadovla birgə uzun illər çalışsaq da, İdarə Heyətində seçimlər başqa formatda keçirilir. Hansı istiqamətdə fəaliyyət göstərə bilərik, hansı səmtdə inkişaf edə bilərik və kimlər bunun üçün nə edə bilər suallarına cavab verən kəslər seçilir və onlar Asif Sayadovun xüsusi sınağından keçmiş şəxslərdir. 4 yaşımızla bağlı bizim şöbənin fəaliyyəti odur ki, bu günü xüsusi bir gün olaraq qeyd etməyi düşünürük. Xüsusi şou xarakterli tədbir planı həyata keçirməyi düşünürük. Lakin tam şəkildə informasiya vermək istəmirəm, sürpriz olaraq qalsın.

- Bəs 4 yaşınız münasibətilə əməkdaşlıq etdiyiniz beynəlxalq qurumlar tərəfindən dəstək alacaqsınızmı?

- Vinq Çun Federasiyası Dünya Vinq Çun Assosiasiyasının üzvüdür. Bu baxımdan üstünlüyümüz çoxdur, hətta dünyanın istənilən ölkəsində yarışlar təşkil etmək kimi hüquqlarımız var. Beynəlxalq turnirlərə qatılmaq üçün isə əvvəlcə gərək Azərbaycanda yarışlara qatılıb müəyyən yer tutasan, daha sonra dünyaya çıxış edə biləsən. Daha dəqiq desək, öncə respublika çempionatında iştirak edirsən, sonra dünya çempionatında, yaxud Avropa çempionatında.

- Bir az öncə Asif Sayadovun məxsusi seçimlərindən danışdınız. Bəs maraqlıdır, federasiyaya üzvlük kastinq şəklində olur, yaxud sosial platformalarınızda link paylaşırsınız, ya çevrədən, tanıdıqlarınızdan federasiyaya cəlb edib üzv edirsiniz? Proses hansı şəkildə olur?

- Əslində İdarə Heyətinin üzvləri elə federasiyanın idmançıları və üzvləridir, kənar şəxslər deyil. Bu federasiyanın klub vaxtından, bünövrəsindən iştirak edənlərdir. Hansı ki, illərin sınağından keçmiş, heç bir qarşılıq ummadan, təmənnasız şəkildə federasiyamızın yaranma və inkişafına qatqısı olan şəxslərdir. Burada Asif Sayadov federasiyanın fəaliyyətində qatqısı olan şəxsləri qiymətləndirir. Yeni qatılan şəxslər olduqda da o zaman artıq hər birimizin məsləhəti ilə seçilir. Burada artıq biz ailəyik.

- Maraqlıdır, bəs sizin federasiyaya nə kimi qatqılarınız olub?

- Bizim şöbənin rəsmi fəaliyyəti Zəfər günündən başladı. Həmin gün artıq vəsiqələrimiz təqdim olundu. Ondan sonra şöbə olaraq ilin yekun tədbirini biz hazırladıq. Bizim şöbə fəaliyyətə başladıqdan sonra yeniyetmə və gənclərdən ibarət olan dünya çempionatlarımız var ki, onlar idmançı olmaqla yanaşı, sosial aktivdir, sosial aktivlik isə piar və marketinq üçün çox önəmli faktordur. Həmin tələbələr bizə könüllü şəkildə dəstək olurlar. Hesab edirəm ki, gələcəkdə federasiyanın İdarə Heyətinin üzvləri də məhz elə onlardır. Hazırda onlar federasiyanın saytında da qeydiyyat linki hazırlayıblar ki, ora gəlmədən sayt vasitəsilə qeydiyyatdan keçmək mümkündür. İlin yekun tədbiri, o cümlədən 20 Yanvar günü ilə əlaqəli biz tədbir və yarışlar keçirdik və o gənclər könüllü olaraq təşkilatçı qismində çıxış edirlər. Hətta o gənclər elə güclü və professional idmançılardır ki, yarışlarda hakim qismində də çıxış edə bilirlər. Həmin o tədbirlərlə yanaşı, 4 yaşımız münasibətilə təşkil etdiyimiz tədbir planında nələr olacaqsa, məsələn, çıxışlar, oyunlar, səhnələr, şoular biz həmin o gənclərlə birgə çalışırıq və onlarla mütəmadi əlaqə qurub, işlərini qiymətləndiririk. Bizdə Şəhanə xanım var ki, "Access" proqramı vasitəsilə bizim aylıq hesabatımızı yaradıb. Hansı ki, illik hesabatlarımızı belə professional şəkildə izləyə bilirik. Düşünürəm ki, çox federasiyada belə bir şey yoxdur. Və biz yenilik etməyə çalışırıq. Bundan əlavə, Vinq Çuna təkcə hobbi olaraq deyil, karyera kimi baxmaq lazımdır. İdmana gələn tələbələr bir müddət sonra artıq müəllim olmaq istəyir. "IP Man" filminə baxırlar və artıq "Ip Man"i kumir olaraq görüb başlayırlar peşəkar şəkildə fəaliyyət göstərməyə. Bir işdə peşəkarlıq varsa, burada artıq hobbidən daha çox karyeradan danışmaq olar.

- Bəs yaxşı, federasiya sizə nəyi öyrətdi?

- Federasiyadan öncə elə Asif Sayadovdan danışmaq istəyərəm ki, o bizə burada sədrlik etmədi, təkcə idman müəllimi olmadı, ailə oldu, həmçinin ailə olmağı, birlik olmağı öyrətdi, arada nə olursa olsun, yumruq kimi olmağı öyrətdi. Biz federasiya olaraq bu günədək bir ailəyik.

- Hazırda federasiyanın inkişafı ilə bağlı hansı işləri həyata keçirirsiniz?

- Bizdə təkcə marketinq sahəsi üzrə deyil, eyni zamanda beynəlxalq əlaqələrin inkişafı ilə bağlı işlər görülür. Beynəlxalq yarışların təşkili, o cümlədən Təşkilat komitəsi bir sıra yarışların təşkil edilməsi üçün işlər görür. Biz də bu tədbirlərdən piar və marketinq şöbəsi olaraq debat şoular hazırlayırıq. Öncə federasiyanın güclü və zəif tərəflərini müəyyən edirik, onları görmək üçün daha aktiv tələbələrdən, üzvlərdən ibarət iki qrup yaradırıq və onlar zəif və güclü tərəfləri sayır. Və beləcə, mübahisəli şəkildə müzakirə olunur. Ən sonda inkişaf etdirməli olduğumuz tərəflərimiz barəsində düşünürük.

- Yekun olaraq qiymətləndirmə necə?

- Yekunda bizim tərəfimizdən seçilmiş hakimlərimiz tərəfindən qiymətləndirmə olur və ən sonda Asif müəllimin qərarı olur. Bundan əlavə, psixoloji seminarlarımız mütəmadi olaraq baş tutur. Vinq Çun sıradan döyüş sənəti deyil, o, eyni zamanda psixologiyaya, fəlsəfəyə söykənir. Burada psixoloji inkişaf və özgüvəndən söhbət gedir. Həmçinin Vinq Çunu tanıyanlar bilir ki, o, həyat tərzidir.

- Vinq Çundan söz düşmüşkən, çox rastlaşıram ki, hər kəs bu sənət növü ilə məşğul ola bilər deyirlər. Bəs əlilliyi olanlar necə?

- Vinq Çun döyüş sənəti sərhəd tanımır. İlk dəfə Dünya Vinq Çun Assosiasiyasının rəhbəri Samuel Kvok Azərbaycana gələndə orada gözübağlı şəkildə şou xarakterli döyüş göstərdi və sübut etdi ki, gözübağlı, görməyən şəxslərdə instinkt daha çox olur. Onlar hissiyyatları ilə döyüşürlər. Əlil insanlar aktiv tərəfləri ilə hərəkət edirlər.

- Komanda şəklində fəaliyyətinizdən danışardıq.

- Əslində ümumi olaraq danışdıq, növbədə yubiley ilimiz olduğu üçün 4 yaşla bağlı tədbirimizə hazırlaşırıq ki, hər şey mükəmməl səviyyədə olsun. Keyfiyyətimizdən söz ola bilməz, lakin hər şey düzgün şəkildə ictimaiyyətə çatmalıdır. Bunun üçün də sosial olaraq, piar olaraq çalışırıq.