Dövlət Departamenti İranı siyasətini dəyişməyə çağırdı

ABŞ ümid edir ki, İran gələcəkdə siyasətinə dəyişiklik edəcək.

Publika.az “Röyters” agentliyinə istinadən xəbər verir ki, bu haqda ABŞ-ın Dövlət departamentinin rəsmi nümayəndəsi Nizer Nauert bildirib.

“Biz İranla danışıqlar stoluna oturmağa hazırıq. Biz ümid edirik ki, onların davranışı dəyişəcək”, - o deyib.

Qeyd edək ki, daha əvvəl ABŞ prezidenti Donald Tramp istənilən vaxt və ilkin şərtlərsiz İran lideri Həsən Ruhani ilə görüşməyə hazır olduğunu bildirib.

Öz növbəsində, İran ABŞ-la danışıqlara qayıtmaq üçün şərtlərini açıqlayıb. İranın prezident administrasiyasının başçısının müavini Həmid Abutalebinin sözlərinə görə, İranla ABŞ-ın danışıqları Vaşinqtonun nüvə sazişinə qayıdışı şərti ilə mümkündür.

“Mədəni cəmiyyətlərdə mübahisələrin həlli metodu kimi dialoqa inananlar bunları yerinə yetirməlidir: İranın böyük millətinə hörmət, döyüş əməliyyatlarının ixtisarı, nüvə sazişinə qayıdış. Nüvə sazişinə qayıdış dialoq üçün məcburi şərtdir”, - Abutalebi tvitterdə yazıb.

Xatırladaq ki, Tramp mayın 8-də Vaşinqton nüvə proqramı üzrə İranla razılaşmadan çıxdığını elan edib. Tramp həm İran, həm də İranla ticarət aparan başqa ölkələr barəsində sanksiyaların bərpa ediləcəyini açıqlayıb. Lakin sazişin Avropa üzrə iştirakçıları – Fransa, Almaniya və İngiltərə, həmçinin Rusiya və Çin bildirdilər ki, İranla sazişin şərtlərinə əvvəlki kimi riayət etmək niyyətindədir.

Ömər