Ağ Ev Çinə qarşı tədbir görəcək

ABŞ hesab edir ki, ötən şənbə günü ABŞ Hərbi Hava Qüvvələri tərəfindən vurulan Çin casus şarında ABŞ rabitəsini izləyə bilən elektron müşahidə sistemi quraşdırılıb.

Publika.az xəbər verir ki, bunu Dövlət Departamentinin yüksək rütbəli rəsmisi deyib.

Onun sözlərinə görə, bu şar “kəşfiyyat məlumatlarının toplanması əməliyyatları aparmağa qadir idi” və “beş qitədə 40-dan çox ölkə” üzərində uçan Çin şarlarından ibarət donanmanın bir hissəsi idi. Bu şarları hazırlayan şirkət Çin ordusu ilə bağlıdır.

Administrasiya rəsmiləri ABŞ konqresmenləri üçün gizli brifinqdə və cümə axşamı Nümayəndələr Palatasında bu mövzuda keçirilən ictimai dinləmədə Çin kəşfiyyat balonunun imkanları və onun necə və nə vaxt vurulacağına dair qərarın necə qəbul edildiyi barədə yeni təfərrüatları açıqlayıb.

Daha sonra Nümayəndələr Palatası yekdilliklə, 419 səslə, Çinin casus şarının ABŞ hava məkanına daxil olmasını “ABŞ-ın suverenliyinin həyasızcasına pozulması” kimi pisləyən qətnamə qəbul edib.

Ayşən