Pakistanlı ən nüfuzlu mükafat qazandı: 10 ilə yazdığı kitab sensasiya yaratdı

Pakistan əsilli amerikalı yazıçı Maxrin Soxail 2026-cı il üçün ABŞ-ın nüfuzlu "PEN/Faulkner Award for Fiction" mükafatının qalibi olub.

Publika.az xəbər verir ki, bu barədə mükafatın rəsmi saytında məlumat yayılıb. Yazıçı bu mükafata debüt hekayələr toplusu olan “Small Scale Sinners” (“Kiçik miqyaslı günahkarlar”) əsərinə görə layiq görülüb.

Münsiflər heyətinin sədri Loren Frensis-Şarma kitabın “kəskin və təsirli üslubu” ilə seçildiyini bildirib. Onun sözlərinə görə, əsər kiçik həcmli olsa da, insan təbiətinin bütün çalarlarını - istək, qəzəb, sevgi və itkiləri dolğun şəkildə əhatə edir.

Qeyd edək ki, müsabiqə çərçivəsində 2025-ci ildə ABŞ müəllifləri tərəfindən nəşr olunan 387 əsər nəzərdən keçirilib. Müraciətlər 155 nəşriyyatdan daxil olub.

Maxrin Soxail Pakistan əsillidir və hazırda ABŞ-ın paytaxtı Vaşinqton şəhərində yaşayır. Yazıçı bildirib ki, kitab üzərində təxminən 10 il çalışıb. Onun sözlərinə görə, əsərdə müasir dünyada qadınların müstəqillik yolları araşdırılıb.

Qeyd edək ki, mükafatın qalibi 15 min dollar pul mükafatı alacaq. Digər finalçılara isə 5 min dollar təqdim ediləcək.

Məlumata görə, mükafatlandırma mərasimi mayın 6-da Vaşinqtondakı Martin Lüter Kinq kitabxanasında keçiriləcək.

PEN/Faulkner mükafatı ABŞ-da ən prestijli ədəbi mükafatlardan biri hesab olunur. 1980-ci ildə yazıçılar tərəfindən təsis edilən bu mükafat satış göstəricilərindən asılı olmadan təqdim edilir və yalnız ABŞ vətəndaşları bu mükafata layiq görülə bilər.

Müəllif: Adəm