300 illik Cəbəllütariq problemi yenidən alovlandı - yanvarın 1-dən...

İspaniya, İngiltərə və Cəbəllütariq muxtar hökuməti “Brexit”in qüvvəyə minəcəyi 1 yanvar 2021-ci il tarixindən etibarən Avropa İttifaqının (Aİ) cənub sərhədi olacaq Cəbəllütariqlə əlaqəli bəzi məsələlərdə razılıq əldə etsə də, danışıqlar davam edir.

Publika.az xəbər verir ki, təxminən 34 min insanın yaşadığı və 6,7 kvadrat kilometrlik ərazisi olan Cəbəllütariq qida ehtiyacları baxımından tam şəkildə xaricdən asılıdır.

Razılaşma əldə olunmazsa, Cəbəllütariq və İspaniya arasındakı mal mübadiləsi yanvarın 1-dən etibarən ciddi iqtisadi təsirləri olan tariflərə əsasən aparılacaq. 10 ay davam edən danışıqlar zamanı tərəflər noyabr ayında İspaniya tərəfində yaşayan və iş üçün hər gün Cəbəllütariqə daxil olan təxminən 15 min Aİ vətəndaşının (onlardan 10 mini ispaniyalıdır) gündəlik giriş və çıxış icazələrinin qanuni əsaslarını qəbul ediblər.

İspaniyanın “El Pais” qəzeti “Brexit”in rəsmi olaraq qüvvəyə minəcəyi 1 yanvar tarixindən etibarən Cəbəllütariq sərhədində qanuni keçid hüquqları barədə razılığın əldə edildiyini iddia edib. Qəzetdə yer alan xəbərdə Cəbəllütariqin ilk dəfə Şengen müqaviləsinə daxil ediləcəyi və yarımadada yaşayanların İspaniya və 26 Şengen ölkəsinə sərbəst girişlərinə icazə veriləcəyi bildirilib.

Qeyd edilib ki, yalnız Cəbəllütariq polisi və Aİ sərhəd təhlükəsizlik bölməsi “Frontex”in yanvarın 1-dən etibarən Cəbəllütariqdəki liman və hava limanlarına nəzarət edəcək və İspaniya polisi bölgəni müvəqqəti tərk edəcək.

Akqabay