Portuqaliyada parlament buraxıldı, ölkə seçkilərə gedir

Portuqaliya parlamenti sosialist hökuməti tərəfindən təklif olunan 2022-ci il üçün dövlət büdcəsini rədd edib. Pandemiyadan sonrakı dövr üçün bərpa planlarına son qoyan büdcə üzrə bu fikir ayrılıqları parlamentin buraxılmasına və növbədənkənar seçkilərə səbəb olub.

Publika.az xəbər verir ki, Portuqaliya Dövlət Şurası səs çoxluğu ilə Prezident Marselu Rebelu di Sozanın parlamentin buraxılması və növbədənkənar seçkilərin keçirilməsi barədə təklifini təsdiqləyib. Prezident yeni seçkilərin tarixini təyin edəcək, çox güman ki, bu yanvarın 30-u olacaq.

Prezident tarix seçərkən partiya seçki proseslərini nəzərə almayacağını təsdiqləyib. Keçmiş nazirlər və iş adamları da daxil olmaqla, ölkənin 117 xadimi Prezident Rebelu di Sozaya seçkilərin fevral ayında keçirilməsi ilə əlaqədar məktub ünvanlayıb.

Hakimiyyətdə qalan və istefa vermək niyyətində olmayan sosialist Antoniu Kosta hökuməti artıq seçkilərin mümkün qədər tez bir zamanda keçirilməsinin tərəfdarı olduğunu bildirib.