Şahzadə bütün titullarından imtina etdi

Böyük Britaniya kral ailəsinin üzvü, Şahzadə Endryu York hersoqu da daxil olmaqla, ona verilmiş bütün titullarından imtina edib.

Publika.az xəbər verir ki, bu barədə məlumatı o, özü bəyan edib.

“Qərara gəldik ki, mənimlə bağlı davam edən ittihamlar Kralın və kral ailəsinin fəaliyyətinə diqqəti yayındırır. Mən hər zaman olduğu kimi, ailəmə və ölkəmə qarşı borcumu hər şeydən üstün tuturam. Beş il əvvəl ictimai həyatdan kənara çəkilmək qərarımın arxasındayam. Kralın razılığı ilə indi bir addım da irəli getməliyəm. Buna görə də mənə verilmiş titullardan və fəxri adlardan imtina edirəm. Qeyd etdiyim kimi, mənə qarşı irəli sürülən ittihamları qəti şəkildə inkar edirəm”, - deyə Şahzadə Endryu bildirib.

Mərhum Kraliça II Elizabetin oğlu olduğu üçün Endryu şahzadə titulunu saxlayacaq.

Onun keçmiş həyat yoldaşı Sara Fergyuson da artıq York hersoginyası titulundan istifadə etməyəcək.

Qeyd edək ki, Şahzadə Endryunun cinsi cinayətlərə görə məhkum olunmuş maliyyəçi Cefri Epsteyn və Çin kəşfiyyatı ilə əlaqəli bir şəxslə münasibətləri barədə yeni xəbərlər yayılmışdı.