Bu gün məşəl Şirvan və Hacıqabulda olacaq

Bakı 2015 İlk Avropa Oyunlarının məşəl estafeti davam edir. Dünən günün ikinci yarısında Neftçalanı dolaşan məşəl artıq Şirvana yola salınıb.

Publika.az xəbər verir ki, festival çərçivəsində Şirvanda saat 14:00-da məşəl estafeti olacaq. Qarşılama mərasimi saat 15:00-da Heydər Əliyev meydanında baş tutacaq. Tədbirin yekunlaşdırılması isə saat 15:30 üçün nəzərdə tutulub.

Kür çayının sahillərini dolaşandan sonra məşəl yürüşü 71 min 200 nəfər əhalisi olan Hacıqabulda davam etdiriləcək. Hacıqabulda saat 17:00-da məşəl estafeti, 18:00-da Heydər Əliyev parkında qarşılama mərasimi baş tutacaq. Tədbirin yekunlaşdırılması isə saat 18:30-da olacaq.

Qeyd edək ki, I Avropa Oyunlarının məşəli 47 gün ərzində Azərbaycanın hər bir guşəsini gəzib dolaşacaq və açılış mərasimində Bakı “Olimpiya” stadionuna gətiriləcək. Estafetə 1000 nəfərdən çox məşəlçi cəlb olunub və hər regionda “Alov festivalı”nın keçirilməsi nəzərdə tutulub. Məşəl yer üstündə avtobus, funikulyor, velosiped, yer altında Bakı metrosu, suda qayıq, havada isə təyyarə ilə daşınacaq. Məşəl iyunun 8-də paytaxtdakı idman arenalarında, 9-da isə İçərişəhərdə gəzdiriləcək.

10 iyun məşəl proqramının son günü olacaq və Bakıya gətirilənədək təxminən 5500 kilometr məsafə qət edəcək. 660 millimetr hündürlüyü olan məşəlin gövdəsi “Bakı-2015” brendində yer alan nar ağacını xatırladır. Alovu qoruyan mis başlıq da nar formasındadır. Onun 50 çəyirdəyi Oyunlarda iştirak edən ölkələrin sayını təmsil edir.

Aygün İlqarqızı