LTIPS proqramına 50 gənc lider cəlb olunub - ICESCO

İslam Dünyası Elm, Təhsil və Mədəniyyət Təşkilatının (ICESCO) Baş direktoru Salim bin Məhəmməd Əl-Malikin Beynəlxalq Gənclər Günü münasibətilə müraciəti yayılıb.

Publika.az bildirir ki, bu barədə Təşkilatın baş ofisindən məlumat verilib. Dünya gənclərini bu əlamətdar gün münasibətilə təbrik edən Baş direktor planetimizin xoşbəxt gələcəyinin məhz onların həmrəyliyindən asılı olduğunu deyib. O əlavə edib ki, ICESCO üzv ölkələrdə gənclərin təhsili, elmin və müasir texnologiyanın ən son nailiyyətlərini mənimsəməsi, qlobal taleyüklü məsələlərdə birlik nümayiş etdirməsi istiqamətində layihə və proqramlar həyata keçirir. Təşkilat tərəfindən gənc nəslin cəmiyyətdə rolunun artırılması, onların liderliyi üzrə 7 proqramın reallaşdırılması davam edir. Eyni zamanda, gənclər yaşlı nəslin təcrübəsindən də faydalanmalı, onların başladığı nəcib təşəbbüsləri davam etdirməlidirlər. Nəsillər arasında əlaqəni möhkəmləndirmək məqsədilə müxtəlif tədbirlər təşkil olunur.

Salim Əl-Malik bildirib ki, ötən il 30 nəfərin seçildiyi ICESCO-nun Sülh və Təhlükəsizlik üzrə Liderlərin Treninqi (LTIPS) proqramının gənclər arasında böyük maraq doğurduğu nəzərə alınaraq, bu il sözügedən təşəbbüsə üzv ölkələrdən 50 gənc lider cəlb olunub. Onlar təşkilatın gənc sülh elçisi statusunu daşıyırlar.