Qrossi Rusiya nümayəndə heyəti ilə ZAES-i müzakirə edəcək

Beynəlxalq Atom Enerjisi Agentliyi (MAQATE) rəhbəri Rafael Qrossi aprelin 5-də Rusiyanın Kalininqrad şəhərinə səfər edəcək.

Publika.az xəbər verir ki, bu barədə MAQATE-nin rəsmi nümayəndəsi Fredrik Dal bildirib.

“MAQATE-nin baş direktoru Rafael Qrossi hərbi münaqişə zamanı Ukraynada Zaporojye AES-in mühafizəsini təmin etmək məqsədilə davam edən məsləhətləşmələr çərçivəsində çərşənbə günü Kalininqrada səfər edəcək”, - təşkilatın sözçüsü bildirib.

Qeyd edək ki, bundan əvvəl Rusiyanın Vyanadakı beynəlxalq təşkilatlardakı daimi nümayəndəsi Mixail Ulyanov bildiribdi ki, Qrossi aprelin 5-də Rusiya tərəfinin nümayəndələri ilə ZAES ətrafındakı vəziyyəti müzakirə edəcək. Onun sözlərinə görə, danışıqlarda Moskvadan idarələrarası nümayəndə heyəti iştirak edəcək.

Qeyd edək ki, Ukraynanın cənub-şərqindəki Zaporojye Atom Elektrik Stansiyası Avropanın ən böyük atom elektrik stansiyasıdır.

Zaporojye Atom Elektrik Stansiyası 2022-ci il martın 4-də Rusiya ordusu tərəfindən ələ keçirilib. Rusiya Prezidenti Vladimir Putin 2022-ci il oktyabrın 5-də elektrik stansiyasının Rusiyanın mülkiyyətinə verilməsi haqqında fərman imzalayıb.